უპრეცედენტო მოვლენაა, რომ ხელისუფლების ოფიციალური პირები წარმოუდგენელი სისასტიკით უსწორდებიან იმ პირებს, რომლებიც საკუთარ აზრს თუნდაც მიუღებელი ფორმით გამოხატავენ, - ამის შესახებ ფრაქცია „ნაციონალური მოძრაობის“ წევრმა სალომე სამადაშვილმა მარნეულის მერის დაკავებასთან დაკავიშირებით განაცხადა.
მისი თქმით, სხვა დამნაშავე პირები უნდა დადგინდნენ, რადგან ეს სისხლის სამართლის დანაშაულია.
„უპრეცედენტო მოვლენაა, რომ ხელისუფლების ოფიციალური პირები წარმოუდგენელი სისასტიკით უსწორდებიან იმ პირებს, რომლებიც საკუთარ აზრს თუნდაც მიუღებელი ფორმით გამოხატავენ. ხელისუფლების რეაგირება რაც ვნახეთ, საკმარისი არ არის. სხვა დამნაშავე პირები უნდა დადგინდნენ, რადგან ეს სისხლის სამართლის დანაშაულია. ეს მხოლოდ ის საკითხი არ არის, სადაც თანამდებობის დატოვება პრობლემას გადაჭრის”, – განაცხადა სამადაშვილმა.
ცნობისთვის, მარნეულის მერი თემურ აბაზოვი დააკავეს, - ამის შესახებ ინფორმაცია "ჯი-ეიჩ-ენს" პროკურატურაში დაუდასტურეს.
მისი დაკავება მარნეულის მკვიდრის მიმართ არაადამიანური და დამამცირებელი მოპყრობის ფაქტს უკავშირდება, რომელზეც საქართველოს პროკურატურა გამოძიებას აწარმოებს.
შეგახსენებთ, სტუდია „მონიტორმა“ ვიდეომასალა გამოაქვეყნა, სადაც მამაკაცი, რომელიც პარლამენტთან აქციაზე ბიძინა ივანიშვილს და მარნეულის მერს სიტყვიერ შეურაცხყოფას აყენებდა, არაადამიანური და დამამცირებელი მოპყრობის მსხვერპლი გახდა.