ბრალდებულის ჯანმრთელობის მდგომარეობის გამო, მისი დაკითხვა ვერ მოხდა - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
როგორც ის განმარტავს, ხვალ დაცვის მხარის მიერ ჩატარებული ექსპერტიზის გამოკვლევა მოხდება, რითიც მნიშვნელოვან კითხვას - საქმეში თუ რამდენი დანა მონაწილეობდა, პასუხი გაეცემა.
"ხვალ სავარაუდოდ, დაცვის მხარის მიერ ახალი ექსპერტიზის დასკვნები იქნება წარმოდგენილი, სადაც პასუხი იქნება კითხვაზე გაცემული, თუ რამდენი სხვადასხვა დანით არის დაჭრილი დავით სარალიძე.
ხვალ სავარაუდოდ დავკითხავთ ექსპერტებს, რომლებმაც აღნიშნული ექსპერტიზა ჩაატარეს.
მოლოდინი გვაქვს, რომ ექსპერტიზის დასკვნით დადგინდება, რომ ორზე მეტი დანა იყო გამოყენებული. რაც შეეხება კადრებს, რომელიც ტელეკომპანია "რუსთავი2"-ის მეშვეობით გავრცელდა, პროკურატურამ ახლახანს გააკეთა განცხადება თითქოს ეს კადრები კონკრეტულ სისხლის სამართლის საქმეში დევს. დარწმუნებით შემიძლია გითხრათ, რომ დაცვის მხარისთვის ეს კადრები არავის გადმოუცია და ბრალდების მხარეს არ გაუცნია, როგორც მტკიცებულება. ამ სისხლის სამართლის საქმეზე, რომელშიც ჩემი დაცვის ქვეშ მყოფს ვიცავ, ეს კადრები როგორც მტკიცებულება, არ დევს. ჩემთვის ეს გაუგებარი განცხადებაა, რადგან დავით სარალიძის მკვლელობის სისხლის სამართლის საქმეზე ეს კადრები, როგორც მტკიცებულება, საერთოდ არ არსებობს", - აცხადებს კაკაბაძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
პროკურორი ზვიად ფხაკაძის განცხადებით, შესაძლოა, ხვალინდელ პროცესზე ერთ-ერთი ბრალდებულიც დაიკითხოს.
"დღევანდელ სხდომაზე უნდა მომხდარიყო დაცვის მხარის მიერ ჩატარებული ექსპერტიზის დასკვნის წარმოდგენა ერთ-ერთი ბრალდებულის ადვოკატის მიერ, თუმცა ადვოკატმა მისი წარმოდგენა ვერ შესაძლო და ამ დასკვნის გამოკვლევა მოხდება ხვალინდელ პროცესზე, ასევე დაიკითხებიან მისი შემდგენი ექსპერტები. ასევე დროის გათვალისწინებით შესაძლებელია დაიკითხოს მეორე ბრალდებულიც. რაც შეეხება დასკვნის შინაარსს, ეს ბრალდების მხარისთვის წინასწარ უცნობია.
ბრალდებულმა განაცხადა, თითქოს, მასზე პოლიციის დაწესებულებაში განხორციელდა გარკვეული ზემოქმედება, რათა სასურველი ჩვენება მიეცა გამომძიებლისთვის, აღნიშნულთან დაკავშირებით, ჩემს მიერ კომპეტენტური პირის მიმართ მოხსენებითი ბარათით მიმართვა მოხდა. გამოკვლეული იქნება როგორც კალანდიაზე თითქოსდა, განხორციელებული ზეწოლის ფაქტები, ასევე ბრალდებულზე, რომელიც წინა სხდომაზე მოწმის სახით იქნა დაკითხული", - აცხადებს ფხაკაძე.