რუსეთის დუმის სპიკერი ბორის გრიზლოვი დარწმუნებულია, რომ რუსეთმა ე.წ. სამხრეთ ოსეთის "დაცვით" სწორი გადაწყვეტილება მიიღო და აღნიშნავს, რომ საქართველოს ხელისუფლებამ ამ კონფლიქტის მშვიდობიანი დარეგულირების შანსი არ დატოვა.
"რუსეთმა ერთადერთი შესაძლო არჩევანი გააკეთა. ჩვენ ჩვენს მოქალაქეებს, ჩვენს სამშვიდობოებს ვიცავდით და ამის გამო ახალი მსხვერპლი არ დავუშვით. საქართველოს ხელისუფლებას მშვიდობა ვაიძულეთ",_ განაცხადა დღეს გრიზლოვმა ჟურნალისტებთან საუბარში.
მისივე თქმით, ამ მოვლენების დავიწყება არ შეიძლება უპირველეს ყოვლისა იმიტომ, რომ ისინი აღარასოდეს აღარ განმეორდეს.
"საქართველოს პრეზიდენტის მიხეილ სააკაშვილის მიერ განხორციელებულმა ქმედებებმა გარდუვალი გახადა აფხაზეთისა და სამხრეთ ოსეთის დამოუკიდებლობის აღიარება. ძალიან დიდი უფსკრული გაჩნდა ამ ხალხებსა და იმ რეჟიმს შორის რომელიც ამჟამად ჯერ კიდევ არის თბილისში", _ აცხადებს გრიზლოვი.
მისივე განცხადებით, რუსეთის ყველა პოლიტიკურმა პარტიამ, მიუხედავად ზოგადი უთანხმოებებისა, აფხაზეთისა და ე.წ. სამხრეთ ოსეთის დამოუკიდებლობის აღიარებას ყველამ ერთხმად დაუჭირა მხარი _ "ედინაია როსიამ", "კომუნისტურმა პარტიამ", "ლიბერალ-დემოკრატიულმა პარტიამ", "სპრავედლივაია როსიამ" _ არ იყო არც ერთი წინააღმდეგი ხმა და არც ერთი "თავის შეკავება".
