„ერთია, როცა დანაშაულს დაგაბრალებენ, მეორეა, როცა ამ სახით აშკარა შეურაცხყოფას გაყენებენ“, - ასე გამოეხმაურა საპყრობილიდან თავდაცვის ყოფილი მინისტრი, ბაჩო ახალაია სოციალურ ქსელში დღეს მის მიმართ გამოტანილ გამამტყუნებელ განაჩენს.
როგორც ახალაია აცხადებს, ის ყველაფერს გააკეთებს იმისთვის, რომ სიმართლე დაამტკიცოს,
„ ეს განაჩენი, ეს სასამართლო, მთლიანად ეს ხელისუფლება დაკავებულია ჩემთვის ისეთი შეურაცხყოფის მოყენებით, რომელმაც სამუდამოდ უნდათ გამანადგუროს მორალურად; მაგრამ ამ შეურაცხყოფაზე ჩემი ერთადერთი პასუხი იქნება ის, რომ რამდენი წელიც არ უნდა დაჭირდეს ყველაფერს გავაკეთებ იმისთვის, რომ ჩემს შვილებს, ჩემს ოჯახს, მთელ ქართულ საზოგადოებას სწორედ ამ მოსამართლეების პირიდან მოვასმენინო სრული სიმართლე. ისინი უნდა წარსდგნენ ხალხის წინაშე და დეტალურად მოყვნენ ვინ დაავალა ასეთი სიბინძურეების კეთება და რატომ ასრულებენ ასეთ ბინძურ დავალებებს“, - აცხადებს ახალაია.
ცნობისთვის, თბილისის საქალაქო სასამართლომ გამამტყუნებელი განაჩენი დაადგინა საქართველოს თავდაცვის ყოფილი მინისტრის და მისი მოადგილის ნიკოლოზ ძიმცეიშვილის მიმართ.პოლკოვნიკ სერგო თეთრაძის წამების საქმეზე ბაჩო ახალაიას სასამართლომ 9 წლით თავისუფლების აღკვეთა მიუსაჯა, ნიკოლოზ ძიმცეიშვილს კი, 4 წლით პატიმრობა.
