გავიდეს პრეზიდენტი და იმ მოკლული გოგოს ნათესავებს ჰკითხოს, არის თუ არა ეს მის წინააღმდეგ მიმართული შავი პიარი, მე მის ადგილას ამის თქმა შემრცხვებოდა, – ამის შესახებ პარლამენტის ვიცე-სპიკერმა გია ვოლსკიმ საზოგადოებრივი მაუწყებლის გადაცემაში „აქტუალური თემა მაკა ცინცაძესთან ერთად“ განაცხადა.
მისი თქმით, უამრავი მაგალითი არსებობს, როცა დამნაშავე ადამიანი დაუმსახურებლადაა შეწყალებული ისე, რომ საკითხი ბოლომდე შესწავლილი არც კომისიას აქვს და არც თავად პრეზიდენტს.
ვოლსკის განცხადებით, როდესაც კაცს ცოლი, თუ მომავალი ცოლი სამსახურიდან გამოჰყავს და ქვით სცემს, ზუსტად უნდა იცოდე, რომ ამ საკითხთან დაკავშირებით მეტი ყურადღება გმართებს. მით უმეტეს, თუ დასასრული ასეთი ტრაგიკულია, თავი კი არ უნდა იმართლო, უნდა გამოხვიდე და იმაზე ილაპარაკო, მომავალში რა უნდა ქნა, რაც მისივე თქმით, ამ შემთხვევის შემდეგ ძალიან რთულად ესახება.
ვოლსკიმ აქვე აღნიშნა, რომ პრეზიდენტის ეს ყოყლოჩინური პოზიცია ერთადერთი შემთხვევა არ არის.
„შეწყალების პროცესზე ცუდის თქმა და კრიტიკა განსაკუთრებულად მიჭირს, რადგან ეს ძალიან სერიოზული, მნიშვნელოვანი აქტია, რომელიც ადამიანურობის შეგრძნებას არ გვავიწყებს, რაც ხშირ შემთხვევაში მეორე ადგილზე გადადის ხოლმე. თუმცა, არ ვიცი, რა ჰქვია იმას, როცა შეწყალების თემას კონვეიერულად უდგები, მოწყალეს, შემწყნარებლის იმიჯის შექმნა გინდა და ათასობით შეწყალებულის საკითხის დეტალურად განხილვის შესაძლებლობას არც ერთ შემთხვევაში არ უშვებ“, – განაცხადა გია ვოლსკიმ.
