მთავრობა მნიშვნელოვან საგადასახადო ცვლილებებს აანონსებს, რომლის განხილვაც მალე პარლამენტში დაიწყება. როგორც ფინანსთა მინისტრმა მამუკა ბახტაძემ განმარტა, ცვლილებების მასშტაბური რეფორმა 120 ათას მეწარმეს შეეხება და მისი მიზანი ქვეყანაში მცირე და საშუალო მეწარმეობის ხელშეწყობაა.
„ჩვენ, ვაპირებთ ძალიან აქტიური გრაფიკით ვემუშაოთ მცირე და საშუალო მეწარმეებს, რომ უკეთესად მოვახდინოთ მათი ინფორმირებულობა, მივიღოთ უკუკავშირი თუ რათა უფრო დავხვეწოთ აღნიშნული ინიციატივა და ხვალ დილიდან ვიწყებთ ფართო შეხვედრებს. შემდგომ გადავინაცვლებთ რეგიონებშიც.
მინდა შეგახსენოთ ახალი რეფორმის ძირითადი პრინციპები:
ჩვენ 5-ჯერ ვამცირებთ გადასახადს. დღეს არსებული რეჟიმი ითვალისწინებს 5%-იან გადასახადს ბრუნვიდან და ეს ნიშნული ჩამოგვყავს 1%-მდე. ამასთან ერთად ვზრდით თანხის მოცულობას 100 ათასი ლარიდან 500 ათას ლარამდე და შესაბამისად ყველა ინდ.მეწარმე რომლის შემოსავალიც წლიურად არ იქნება 500 ათასზე მეტი, შეუძლია აღნიშნული რეჟიმით ისარგებლოს. აქვე მინდა განვმარტო, რომ ეს შეეხება თითქმის 100%-ს ინდივიდუალურ მეწარმეებისას. ამასთან ერთად მნიშვნელოვნად ვამარტივებთ საგადასახადო ადმინისტრირებას, ფაქტობრივად ბუღალტერიის წარმოების ვალდებულება გაუუქმდებათ.
ასევე მნიშვნელოვანი ცვლილებაა ის, რომ საავანსო გადასახადები გაუქმდება. დღეს არსებული პრაქტიკა ითვალისწინებს წინასწარ გადასახადების გადახდას და აქაც ჩვენ მაქსიმალურად შეღავათიან რეჟიმზე გადავდივართ. თვის ბოლოს ექნებათ მეწარმეებს გადასახადელი 1%-იანი გადასახადი“, აღნიშნა ფინანსთა მინისტრმა
მამუკა ბახტაძის განმარტების დღეს მთავრობის სხდომაზე წარდგენილი იქნა ასევე 6 ახალი ინიციატივაც.
ეკონომიკური საქმიანობის განმახორციელებელი ორგანიზაციები, ფაქტობრივად, გათავისუფლდებიან მოგების გადასახადისგან.
უქმდება გრძელვადიანი კონტრაქტის დღგ-ითი დაბეგვრის სპეციალური ნორმები.
დღგ-სგან გათავისუფლდება საქართველოს სახელმწიფო საზღვრის ფარგლებში საჰაერო ხომალდებისათვის ტექნიკური მომსახურების გაწევა.
საქართველოდან სატრანსპორტო საშუალებების ექსპორტის წახალისების მიზნით, იმპორტიორს უფლება ეძლევა დაიბრუნოს მსუბუქ ავტომობილსა და მოტოციკლზე გადახდილი აქციზის 100% - ის ოდენობა, იმ შემთხვევაში, თუ აღნიშნული სატრანსპორტო საშუალების ექსპორტი განხორციელდება 90 დღის განმავლობაში.
სრულად გათავისუფლდება აქციზისაგან შეზღუდული შესაძლებლობის მქონე პირთა პირადი გამოყენებისათვის იმპორტირებული სატრანსპორტო საშუალებები.
2023 წლის 1 იანვრამდე გადავადდება მოგების გადასახადის ახალ მოდელზე გადასვლა საფინანსო სექტორისთვის - ბანკები, საკრედიტო კავშირები, სადაზღვევო ორგანიზაციები, მიკროსაფინანსო ორგანიზაციები და ლომბარდები.
