უკრაინის გენერალური პროკურატურა აპირებს საქართველოს ყოფილი პრეზიდენტი მიხეილ სააკაშვილი სპეცდანიშნულების რაზმ „ბერკუტის“ ყოფილი მებრძოლების საქმეზე ვიდეოკონფერენციის რეჟიმში დაკითხოს. ამის შესახებ პროკურორმა იანის სიმონოვმა განაცხადა.
„ჩვენ შევატყობინებთ სააკაშვილის წარმომადგენლებსა და სასამართლოს, რომ აუცილებელია დადგინდეს დაკითხვის თარიღები, რათა სააკაშვილი მას პირადად დაესწროს. თუ „ახალი ძალების“ ლიდერი არ ჩამოვა უკრაინაში, ჩვენ მივმართავთ სასამართლოს ვიდეოკონფერენციის რეჟიმში დაკითხვის ნებართვის მისაღებად“, - განაცხადა პროკურორმა.
კიევის სვიატოშინსკის რაიონულ სასამართლოს მიხეილ სააკაშვილის 13 თებერვალს უკრაინის შსს-ს სპეცდანაყოფის „ბერკუტის“ ხუთი ყოფილი თანამშრომლის საქმეზე უნდა დაეკითხათ. სასამართლომ მისი დაკითხვის გადაწყვეტილება იმასთან დაკავშირებით მიიღო, რომ საქართველოს ორი მოქალაქე კობა ნერგაძე და ალექსანდრე რევაზიშვილი მიხეილ სააკაშვილს მაიდნის მოვლენების შესახებ გადაღებულ იტალიურ ფილმში ახსენებენ.
ბრალდებული „ბერკუტელების“ ადვოკატის მტკიცებით, საქართველოს მოქალაქეები იყვნენ მოწმეები, თუ როგორ ესროდნენ სნაიპერები ცეცხლს მაიდანზე მყოფ როგორც მომიტინგეებს, ისე სამართალდამცველებს.
იტალიური ტელეკომპანიის ეთერში გასულ ფილმს უკრაინის ყოფილი პრეზიდენტის ვიქტორ იანუკოვიჩის ადვოკატებიც იყენებენ.
კიევში 2014 წლის 20 თებერვალს სროლის შედეგად მაიდანზე 53 ადამიანი დაიღუპა, მათ შორის აქციის 49 მონაწილე და ოთხი სამართალდამცველი.
