„ამაყი ვარ, რომ ქალაქის განვითარებაზე ორიენტირებული ბიუჯეტის დამტკიცებაში ვმონაწილეობ. ჩვენ ყველანი პირნათელი ვართ ჩვენი ამომრჩევლის წინაშე“, - ამის შესახებ თბილისის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარემ რევაზ სოხაძემ სხდომაზე სიტყვით გამოსვლისას განაცხადა. მისი თქმით, 2018 წლის ბიუჯეტის პროექტი ყველა იმ პრიორიტეტს ასახავს, რომელსაც თბილისის მოსახლეობამ მხარი დაუჭირა.
სოხაძე დედაქალაქის მთავარ ფინანსურ დოკუმენტთან დაკავშირებით ოპონენტების მიერ გამოთქმულ შენიშვნებსაც გამოეხმაურა და განაცხადა, რომ როდესაც ოპოზიცია საუბრობს იმაზე, რომ მათი შენიშვნები კახა კალაძემ არ გაითვალისწინა, მათ ადრესატი ეშლებათ.
„თქვენი მოსაზრებები არა კახა კალაძემ, არამედ თბილისის მოსახლეობამ არ გაითვალისწინა. ჩვენ გვაკისრია პასუხისმგებლობა თბილისელების წინაშე და ბიუჯეტის ეს პროექტი სწორედ ამ პასუხისმგებლობის გამოხატულებაა“, - განაცხადა რევაზ სოხაძემ.
მისივე თქმით, რჩება შთაბეჭდილება, რომ ოპოზიციას თბილისის სიცოცხლით სავსე ქალაქად გადაქცევის ეშინია.
„თქვენ გაშინებთ კახა კალაძის და მისი მთავრობის წარმატება, რადგან ეს ნაბიჯ-ნაბიჯ თქვენ პოლიტიკურ მომავალს სულ უფრო ბუნდოვანს ხდის. მანამ, სანამ თქვენ ნაძვის ხეზე გაკეთებულ წარწერას აპროტესტებთ, ჩვენ ამ სლოგანის რეალობად გადაქცევაზე ვმუშაობთ“ - განაცხადა საკრებულოს ურბანული დაგეგმარებისა და საქალაქო მეურნეობის კომისიის თავმჯდომარემ.
