"მიხეილ სააკაშვილი სასამართლოს უნდობლობას უცხადებს და აღარ თვლის, რომ ადვოკატებმა ამ საქმეში უნდა მიიღონ მონაწილეობა. ადვოკატები სახელმწიფოს მხრიდან დაინიშნონ. დღეს გამოვცხადდით იმისთვის, რომ პატივისცემა გამოგვეხატა სასამართლოს წინაშე და ეს პოზიცია დაგვეფიქსირებინა", - განაცხადა ადვოკატმა დავით კაკოიშვილმა.
დაცვის მხარის განცხადებით, კომუნიკაცია ყოფილ პრეზიდენტთან გუშინ შედგა.
"ეს ნამდვილად მიხეილ სააკაშვილის პოზიციაა. ჩვენ გვაქვს ინტენსიური კავშირი მიხეილ სააკაშვილთან, მას watsApp-is საშუალებით ვესაუბრეთ", - დასძინა ადვოკატმა.
როგორც ადვოკატები განმარტავენ, საქართველოს ყოფილმა პრეზიდენტმა და ოდესის ოლქის ყოფილმა გუბერნატორმა, მიხეილ სააკაშვილმა ადვოკატების აცილების გადაწყვეტილება 12 დეკემბერს მიიღო.
ცნობისთვის, სააკაშვილს ბრალდების მხარე გირგვლიანის მკვლელობის საქმეში სამსახურებრივი უფლებამოსილების ბოროტად გამოყენებას ედავება.
პროკურატურის ბრალდების თანახმად, სააკაშვილის მხრიდან მოხდა დანაშაულის დაფარვა, გამოძიების გაყალბება, დანაშაულში ჩართული მაღალი თანამდებობის პირებისთვის ხელის დაფარება და მათთვის პასუხისმგებლობის თავიდან არიდება.
