ე.წ ციანიდის საქმეზე მსჯავრდებულმა, დეკანოზმა - გიორგი მამალაძემ დღევანდელ სასამართლო პროცესზე განაცხადა, რომ მას ე.წ. მატროსოვის ციხეში არსებულ ეკლესიაში ლოცვის უფლებას არ აძლევენ.
როგორც პროცესის დასრულების შემდეგ, მსჯავრდებულის ადვოკატმა, გიორგი ფანცულაიამ განმარტა, დეკანოზს ეუბნებიან, რომ თავის საკანში ილოცოს.
"ე.წ. მატროსოვის ციხეში არსებობს ეკლესია, რომელსაც თავისი მოძღვარი ჰყავს, ის აღავლენს წირვა ლოცვას, გარკვეული პირები, მათ შორის პატიმრები ამ წირვა ლოცვას ესწრებიან. მღვდელპატიმარ გიორგი მამალაძეს კი უფლებას არ აძლევენ შევიდეს, წირვა-ლოცვას დაესწროს, დაანთოს სანთელი და ილოცოს. ეუბნებიან - შენს საკანში ილოცეო. მას არც რელიგიური სამოსის ჩაცმის უფლებას აძლევენ, მაგრამ რა დროს ამ სამოსის ჩაცმის უფლებაზეა საუბარი, როცა იმ ეკლესიაში არ უშვებენ, რომელიც ამ დაწესებულებას სწორედ იმისთვის აქვს, რომ პატიმარმა ილოცოს" - განუცხადა ჯი-ეიჩ-ენს გიორგი ფანცულაიამ.
რაც შეეხება იმას, დაესწრება თუ არა დეკანოზი მამალაძე მომდევნო სასამართლო პროცესებს, ეს ადვოკატისთვის უცნობია.
"მინდა დეკანოზს ვთხოვო, რომ დაესწროს სასამართლო პროცესებს, თუმცა დღეს პროცესიდან ისეთი პოზიციით წავიდა, ვერ დაგპირდებით, რომ ამას შევძლებ", - დასძინა ადვოკატმა.