საიას ყოფილმა თავმჯდომარემ, ანა ნაცვლიშვილმა და ახალ არჩეულმა თავმჯდომარემ სულხან სალაძემ ერთობლივი პრესკონფერენცია გამართეს.
სალაძემ ნაცვლიშვილს მადლობა გადაუხადა გაწეული საქმიანობისთვის და განმარტა, რომ
მუშაობას გააგრძელებს ყველა იმ საკითხზე, რაზეც ორგანიზაცია ამ დრომდე მუშაობდა და გარდა ამისა, ის გეგმავს, ისეთ თემებს შეეხოს, რასაც საია აქტიურად არ ფარავდა.
სულხან სალაძის განმარტებით, ასეთ ახალ საკითხებს შორის ერთ-ერთი აუცილებლად იქნება გარემოსთან დაკავშირებული გამოწვევები.
“გარემოსთან დაკავშირებული საკითხები სასიცოცხლოდ მნიშვნელოვანია ჩვენთვის, რადგანაც ძალიან ბევრი პრობლემა, რაც ქვეყანაში გვაქვს, მათ შორის დაკავშირებულია იმ გარემოსთან, რომელშიც ჩვენ გვიწევს ცხოვრება. ვფიქრობ, ეს არის ერთ-ერთი ის საკითხი, რომელზეც რაც უფრო მეტს ისაუბრებს სამოქალაქო სექტორი და მეტს გააკეთებს, მით უფრო ბევრს მოვიგებთ ამით და ბევრი სიცოცხლის გადარჩენას შევუწყობთ ხელს”, - განაცხადა სულხან სალაძემ.
მისივე თქმით, საია იმუშავებს ყველა მიმართულებით, სადაც ადამიანის უფლებების დაცვა იქნება საჭირო.
“საიას გუნდი შეეცდება ჩვენი საქმიანობა უფრო მეტად აისახოს გადაწყვეტილებების მიმღებ პირთა საქმიანობაზე - ჩვენ ვიქნებით ყველგან, სადაც იქნება ადამიანის უფლებების დაცვა საჭირო. ერთ-ერთი მნიშვნელოვანი გამოწვევა არის ის, რომ ზოგადად, შეიძლება ხელისუფლება საუბრობდეს, რომ ადამიანის უფლებების დაცვის მიმართულებით სერიოზული გამოწვევები არ არის, თუმცა ინდივიდუალურ შემთხვევებს და აზერბაიჯანელი ჟურნალისტის აფგან მუხთარლის გატაცების ფაქტს თუ გავიხსენებთ, ამან მნიშვნელოვნად კითხვის ნიშნის ქვეშ დააყენა საკითხი, რეალურად დაცულია თუ არა ადამიანის უფლებები საქართველოში. გარდა ამისა, უამრავი თემაა, მათ შორის შეიძლება ვისაუბროთ ოჯახში ძალადობასთან დაკავშირებულ საკითხებზე, რელიგიურ უმცირესობებზე და სხვა”, - განაცხადა სულხან სალაძე.
შეგახსენებთ, სულხან სალაძე საიას თავმჯდომარედ ერთი წლით გუშინ, გვიან ღამით აირჩიეს.