„დათა ახალაიას დღევანდელი ჩვენება არსებითად მნიშვნელოვანია, რადგან მოცემულ საქმეში არცერთი მტკიცებულება არ მოიპოვება იმასთან დაკავშირებით, რომ მიხეილ სააკაშვილი ვინმეს წინასწარ რამეს შეპირდა. მოწმეები, ოქრუაშვილი და მელნიკოვი ამბობდნენ, რომ მათ დათა ახალაიასგან იცოდნენ, რომ პრეზიდენტმა გარკვეული დაპირება გასცა. სასამართლოზე კი ყველამ მოვისმინეთ, ახალაიას სიტყვები, რომ მსგავსი რამ მას არ უთქვამს“, - აცხადებს მიხეილ სააკაშვილის ადვოკატი, ბექა ბასიალაია.
როგორც ადვოკატი განმარტავს, დღევანდელ სასამართლო პორცესზე ბრალდების მხარის კითხვებს საქმესთან სამართლებრივი კავშირი არ ჰქონდა.
„პროკურორების კითხვების 90 პროცენტს ამ საქმესთან სამართლებრივად არანაირი კავშირი არ ჰქონდა. მოწმემ დასაწყისშივე განაცხადა, რომ საქმეზე, რომელზეც თვითონ არის ბრალდებული, ის ჩვენებას არ მისცემდა. ამის მიუხედავად, პროკურორების მხრიდან დაახლოებით, 50 კითხვა დაისვა ახალაიას სისხლის სამართლის საქმეზე და დაახლოებით, 5-6 კითხვა დაისვა მიხეილ სააკაშვილის ბრალდების საქმესთან დაკავშირებით“, - განაცხადა ბასიალაიამ.
ცნობისთვის, მტკიცებულებების გამოკვლევის ეტაპი დასრულდა, შემდეგ პროცესზე მხარეები დასკვნით სიტყვას წარმოთქვამენ.
შემდეგი სასამართლო პროცესი თბილისის საქალაქო სასამართლოში პირველ დეკემბერსაა ჩანიშნული.
შეგახსენებთ, რომ გირგვლიანის საქმეზე მიხეილ სააკაშვილს ბრალი სამსახურებრივი უფლებამოსილების ბოროტად გამოყენების მუხლით, შეწყალების ეპიზოდში აქვს წაყენებული. სწორედ, აღნიშნულ საქმესთან დაკავშირებით დაიკითხა დღეს თბილისის საქალაქო სასამართლოში დისტანციურად, „სკაიპის“ საშუალებით კუდ-ის ყოფილი უფროსი, დავით ახალაია.