„დემოკრატიული მოძრაობა - თავისუფალი საქართველოს“ თბილისის მერობის კანდიდატმა კახა კუკავამ და საკრებულოს თავმჯდომარეობის კანდიდატმა დიმიტრი ლორთქიფანიძემ ვაკის პარკთან განთავსებულ ინგლისურენოვან სარეკლამო აბრაზე საღებავით ქართული წარწერები გააკეთეს.
პარტიაში აცხადებენ, რომ „რეკლამის შესახებ“ საქართველოს კანონის მე-4 მუხლით დადგენილი წესის შესაბამისად საქართველოს მთელ ტერიტორიაზე აბრაზე წარწერა შესრულებული უნდა იყოს სახელმწიფო ენაზე. ხოლო უცხოენოვანი წარწერის შემთხვევაში, აბრაზე დატანილი უნდა იყოს ქართული წარწერაც. დადგენილი წესის დარღვევა „ადმინისტრაციულ სამართალდარღვევათა კოდექსის“ მიხედვით გამოიწვევს პირის დაჯარიმებას.
,,მიუხედავად აღნიშნული დანაწესისა, თბილისის პრაქტიკულად ყველა უბანში სარეკლამო აბრები კანონდარღვევით, მხოლოდ ინგლისურ ან მხოლოდ არაბულ ენაზეა განთავსებული, ხოლო მერიის ზედამხედველობის სამსახური, რომლის კომპეტენციასაც წარმოადგენს ამ საკითხის მონიტორინგი, არაფერს მოქმედებს კანონის მოთხოვნათა აღსრულებისთვის.
დღეს, „დემოკრატიული მოძრაობა - თავისუფალი საქართველოს“ თბილისის მერობის კანდიდატმა კახა კუკავამ და საკრებულოს თავმჯდომარეობის კანდიდატმა დიმიტრი ლორთქიფანიძემ ვაკის პარკთან განთავსებულ ინგლისურენოვან სარეკლამო აბრაზე საღებავით სანიმუშოდ გააკეთა ქართული წარწერები“, - აღნიშნულია პარტიის მიერ მიერ გავრცელებულ განცხადებაში.