საქართველოში მიღწეული პროგრესი აშკარაა, თუმცა მზად ვართ რეფორმების გასაგრძელებლად. ამის შესახებ საქართველოს საგარეო საქმეთა მინისტრმა ევროპარლამენტის საგარეო კომიტეტში გამოსვლისას განაცხადა, რომელზეც საქართველოში გატარებულ რეფორმებზე, ასოცირების დღის წესრიგსა და აღმოსავლეთ პარტნიორობის მოახლოებულ სამიტზე ისაუბრეს. მიხეილ ჯანელიძემ კომიტეტის სხდომაზე ევროპარლამენტარების შეკითხვებსაც უპასუხა. საქართველოს პირველმა დიპლომატმა ყურადღება ევროპარლამენტის მხარდაჭერისა და ღია კარის პოლიტიკის მნიშვნელობაზე გაამახვილა. მან საკონსტუტუციო რეფორმაზე, ვენეციის კომისიის დასკვნაზე, სამიტის წინ ქართული მხარის მოლოდინებსა და რუსულ ოკუპაციაზეც ისაუბრა.
"ჩვენ ველოდებით აღმოსავლეთ პარტნიორობის სამიტს. ჩვენ გვაქვს მიზანი, წარმატებას მივაღწიოთ 6 მიმართულებით. ჩვენ გვსურს მეტი ინტეგრაცია ევროსტრუქტურებთან, დიალოგის გააქტიურება სექტორალური თანამშრომლობის მიმართულებით, ფიზიკური ინტეგრაცია კომუნიკაციისა და ენერგეტიკულ სფეროებში, განათლებისა და სოციალურ სფეროებში თანამშრომლის გარრმავება და უსაფრთხოების სფეროში თანამშრომლობის გააქტუურება. სამიტზე მიღებულ გადაწყვეტილებებს, ევროსტრუქტურების მხარდაჭერასა და ორგანიზაციის ღია კარის პოლიტიკას ჩვენთვის უაღრესად დიდი მნიშვნელობა აქვს.
ევროკავშირი მხარს უჭერს საქართველოს ტერიტორიულ მთლიანობას. თქვენ იცით, რომ რუსეთი განაგრძობს საქართველოს ტერიტორიების ოკუპაციას, აფორმებს ე.წ. შეთანხმებებს, რაც მიზნად ისახავს ამ რეგიონების ანექსიას. რუსეთი განაგრძობს სამხედრო ბაზების გაძლიერებას ორივე ოკუპირებულ რეგიონში და არღვევს 2008 წლის შეთანხმების პირობებს. მძიმე პირობებში იმყოფება ოკუპირებულ ტერიტორიაზე მცხოვრები ქართული მოსახლეობა. მათ დევნიან ეთნიკური ნიშნით, აპატიმრებენ. მათ არ ეძლევად უფლება, ისწავლონ მშობლიურ ენაზე. მათი ყველა ფუნდამენტური უფლება დარღვეულია"-განაცხადა ჯანელიძემ.
