საკონსტიტუციო სასამართლომ დააკმაყოფილა მოქალაქე გიორგი ქართველიშვილის სარჩელი პარლამენტის წინააღმდეგ და არაკონსტიტუციურად სცნო სისხლის სამართლის კოდექსის ის ნორმა, რომელიც მსჯავრდებულის მხრიდან პენიტენციური დაწესებულების თანამშრომლის კანონიერი მოთხოვნისადმი არაერთგზის დაუმორჩილებლობისთვის რვიდან ათ წლამდე ვადით თავისუფლების აღკვეთას ითვალისწინებდა. მოსარჩელის აზრით, სადავო ნორმა აწესებდა შეუსაბამოდ მაღალ პასუხისმგებლობას და ლახავდა საქართველოს კონსტიტუციით დაცულ ადამიანის ღირსების უფლებას.
საქართველოს საკონსტიტუციო სასამართლომ გაიზიარა მოსარჩელის პოზიცია და სადავო სასჯელი უმიზნოდ და არაპროპორციულად ჩათვალა. სასამართლომ ნორმა არაკონსტიტუციურად ცნო საქართველოს კონსტიტუციის მე-17 მუხლის მე-2 პუნქტთან მიმართებით. საკონსტიტუციო სასამართლოს გადაწყვეტილება საბოლოოა და გასაჩივრებას არ ექვემდებარება. კანონმდებლებს სადავო ნორმის შეცვლა მოუწევთ.
