17 ოქტომბერს, 17:00 საათზე, თელავში, ერეკლე II-ის მოედანი 7, თელავის დრამატული თეატრი ფოიეში გაიმართება ქალთა პოლიტიკური და ეკონომიკური გაძლიერებისაკენ მიმართული კამპანიის რეგიონალური წარდგენა.
ღონისძიებას გახსნიან დუტა სხირტლაძე და გენდერული თანასწორობისთვის საქართველოში გაეროს ერთობლივი პრგრამის მენეჯერი, მაკა მეშველიანი.
პრეზენტაციაზე წარმოდგენილი იქნება ინტერაქტიული აქტივობები, ინსტალაციები და შეჯიბრებები, რომელთა მეშვეობით ღონისძიების სტუმრები მიიღებენ საყურადღებო ინფორმაციას საქართველოში გენდერული თანასწორობის შესახებ.
თელავის პრეზენტაციის შემდეგ, 18 და 19 ოქტომბერს, კამპანია გადაინაცვლებს თელავისა და ახმეტის მუნიციპალიტეტების სოფლებში, კერძოდ ნაფარეულში, ფშაველში, კისისხევსა და ქვემო ალვანში, სადაც კამპანიის კეთილი ნების ელჩი დუტა სხირტლაძე და გაეროს განვითარების პროგრამის წარმომადგენლები შეხვდებიან ადგილობრივ მოსახლეობას გენდერული თანასწოროების შესახებ ცნობიერების ამაღლების მიზნით.
საზოგადოებრივი კამპანიის სლოგანია „თანასწორობა გვჭირდება“ (თან ასწორებს!). მისი მიზანია, ხაზი გაუსვას გენდერული თანასწორობის მნიშვნელობას საზოგადოების პოლიტიკური, ეკონომიკური და სოციალური განვითარებისათვის.
კამპანია წარმოაჩენს იმ ხილულ თუ უხილავ ბარიერებს, რომლებსაც აწყდებიან კარიერული წინსვლით დაინტერესებული ქალები, და ხელს უწყობს საზოგადოებრივ მსჯელობას საქართველოს პოლიტიკასა და ეკონომიკაში ქალების არასაკმარისი ჩართულობის შესახებ.
კამპანიის ინიციატორები არიან გაეროს განვითარების პროგრამა (UNDP) და შვედეთის მთავრობა გენდერული თანასწორობისათვის გაეროს ერთობლივი პროგრამის ფარგლებში.