„ხვალ თბილისის სააპელაციო სასამართლოში დაცვის მხარე დასკვნითი სიტყვით წარვსდგებით. სავარაუდოდ, განაჩენიც ხვალ დადგება. ჩვენ პირველი ისტანციის მიერ გამოტანილი გამამართლებელი განაჩენის ძალაში დატოვებას ვითხოვთ“, - განუცხადა „ჯი-ეიჩ-ენ-ს“ დავით ოთხმეზურის მკვლელობაში ბრალდებულ ასლან ბეჟანიძის ადვოკატმა, ტარიელ კაკაბაძემ.
ბრალდების მხარემ თბილისის საქალაქო სასამართლოს მიერ გამოტანილი გამამართლებელი განაჩენი გაასაჩივრა. პროკურატურა ასლან ბეჟანიძის მიმართ გამამტყუნებელი განაჩენის გამოტანას მოითხოვს.
„მოგეხსენებათ, 2004 წელს დავით ოთხმეზურის გახმაურებული მკვლელობა მოხდა. აღნიშნულ მკვლელობაზე, 2016 წელს ჩემი დაცვის ქვეშ მყოფი ასლან ბეჟანიძე დააკავეს. თუმცა, ბეჟანიძე თბილისის საქლაქო სასამართლომ გაამრათლა, ის სრულად სცნო უდანაშაულოდ და პატიმრობიდან გაათავისუფლა. პროკურატურამ პირველი ისტანციის მიერ გამოტანილი განაჩენი თბილისის სააპელაციო სასამართლოში გაასაჩივრა. პროკურატურა გამამართლებელი განაჩენის გაუქმებას და გამამტყუნებელი განაჩენის გამოტანას ითხოვს“, - აღნიშნავს კაკაბაძე.
თუ რატომ მოხდა ასლან ბეჟანიძის აღნიშნულ მკვლელობასთან დაკავშირება, ადვოკატს პასუხი ამაზეც აქვს.
„თავის დროზე, საქმე არ გამოიძიეს, რეალურ დამნაშავეს ხელი დააფარეს და სრულიად უდანაშაულო ადამიანს კონკრეტულმა პირებმა ხელი დაადეს. შესაბამისად, უდანაშაულო ადამიანი გახდა ბრალდებული. ვითომ პირდაპირ მოწმეთა დაკითხვების მიუხედავად, დაცვის მხარემ შევძელით დაგვემტკიცებინა, რომ ბრალდებული უდანაშაულოა და ამ მოწმეთა ჩვენებები სულ მცირე, არასანდო და არადამაჯერებელია“, - განუცხადა „ჯი-ეჩ-ენ-ს“ ტარიელ კაკაბაძემ.
შეგახსენებთ, რომ 2004 წლის 27 ოქტომბერს, თბილისში, აკადემიკოს მარიკა ლორთქიფანიძის 18 წლის შვილიშვილი, დავით ოთხმეზური მოკლეს. აღნიშნულ საქმეზე პროკურატურა 11 წლის განმავლობაში დუმდა. 2015 წელის მარტში კი პროკურატურამ აღნიშნულ საქმეზე გამოძიება გააქტიურა. 2016 წლის 26 მარტს, სასამართლოს განჩინების საფუძველზე ასლან ბეჟანიძე დააკავეს. პროკურატურა ირწმუნებოდა, რომ 2004 წლის მკვლელობის დღეს, დავით ოთხმეზურსა და ასლან ბეჯანიძეს შორის კონფლიქტი მობილიურ ტელეფონთან დაკავშირებით წარმოიშვა, რა დროსაც, ბეჯანიძემ ოთხმეზურს დანით რამდენიმე ჭრილობა მიაყენა და შემთხვევის ადგილიდან მიიმალა.
2016 წლის 22 დეკემბერს, თბილისის საქალაქო სასამართლომ ასლან ბეჟანიძე უდანაშაულოდ სცნო და პატიმრობიდან გაათავისუფლა.