თბილისში, ვაკის პარკის მიმდებარე ტერიტორიაზე, 15 აგვისტოს ღამით რუსულ ენაზე მოსაუბრე მამაკაცმა ახალგაზრდა გოგონას გაუპატიურება სცადა, - ამის შესახებ გოგონას მეგობარი ანა ჯანაშია სოციალურ ქსელში წერს.
სავარაუდოდ, ძალადობის მსხვერპლ გოგონას მეგობრის ინფორმაციით, უცნობი მამაკაცი ჯერ გოგონას დაეკონტაქტა და გაცნობა სთხოვა, როცა თხოვნაზე უარი მიიღო, ის გაღიზიანდა და გოგონაზე იძალადა.
ანა ჯანაშიას ინფორმაციით, გოგონამ პატრული გამოიძახა, რომელმაც განყოფილებაში გადაიყვანა და შეადგინეს ოქმი, სადაც არ აღნიშნეს სექსუალური ძალადობის შემცველი არც ერთი ქმედება და ფიზიკური დაზიანებები, რომელიც გოგონას აღენიშნებოდა.
ჯანაშიას ინფორმაციით, ვინმე გამომძიებელმა ლევანიმ დაზარალებულს ურჩია, "არ უთხრას ეს ამბავი არავის, რადგან ჭორაობას დაიწყებენ და არ გაწყობსო".
"გუშინ, 15 აგვისტოს, სადღაც ღამის 11ს გადაცილებული იქნებოდა, როცა ჩემი მეგობარი გოგონა ბრუნდებოდა სამსახურიდან სახლში საღამოს ცვლიდან. ვაკის პარკის ტერიტორიაზე, მიწისქვეშა გადასასვლელში მას აედევნა უცნობი მამაკაცი, რომელიც დაეკონტაქტა რუსულ ენაზე (!) და გაცნობა სთხოვა. თხოვნაზე უარის მიღების შემდეგ, მამაკაცი გააგრესიულდა, დაიჭირა, დაუწყო ტანსაცმელზე ჯაჯგური, გახდის მიზნით (!), ჩემმა მეგობარმა (რომლის სახელს და გვარს შეგნებულად არ ვასახელებ, რადგან ისედაც საშინლად დასტრესილს კიდევ არ დავუმატო სტრესი) ატეხა ყვირილი, ამოიღო ტელეფონი პატრულის გამოძახების მიზნით, რაზეც კიდევ უფრო გააგრესიულდა მოძალადე და დიდი ომის, ჯაჯგურის და გაუპატიურების მცდელობის შემდეგ, როგორღაც მოახერხა გოგონამ გამოქცევა!
ამოვიდა ტრასაზე და შევარდა მაღაზიაში, სადაც უთხრეს, რომ ყვირილი გაიგეს, მაგრამ ეგონათ " ბავშვები მაიმუნობდნენ" და არ გამოიხედეს. მსგავსი გულგრილობა არ ვიცი, თან ღამის 12 საათზე. თუმცა ყველაზე საინტერესო ამის შემდეგ იწყება! გოგონა იძახებს პატრულს, რომელსაც მიჰყავს განყოფილებაში. ვაკის გამომძიებელი, ვინმე ლევანი ადგენს ოქმს, სადაც საერთოდ არ აღნიშნავს სექსუალური ძალადობის შემცველ არც ერთ ქმედებას, არ აღნიშნავს ფიზიკურ დაზიანებებს, რომელიც გოგონას აღენიშნებოდა (და საბედნიეროდ ამის ფოტო-მასალა არსებობს, რასაც დავურთავ ამ პოსტს) და იჩენს აბსოლუტურ გულგრილობას აღნიშნულის მიმართ.
როგორც მეგობარი მიყვება, იმდენად განერვიულებული და დასტრესილი იყო, იმ მომენტში ვერ მიაქცია ამ დეტალებს ყურადღება. ამბობს, რომ იმ ჩვენებაში, რაც გამომძიებელმა შეადგინა, ხულიგნობას უფრო გავს, ვიდრე გაუპატიურების მცდელობას!! და ეს ყველაფერი არ არის - ჩემი მეგობარი იღებს "მეგობრულ რჩევას" გამომძიებელ ლევანისგან, რომ არ უთხრას ეს ამბავი არავის, რადგან ჭორაობას დაიწყებენ და არ გაწყობსო. ამაზე საერთოდ შოკში ჩავვარდი!! ანუ არ უნდა ამოვიღოთ ხმა იმაზე რომ ქუჩაში ჩვენი გაუპატიურება უნდათ, რადგან ამის თავად ჩვენ, მსხვერპლებს უნდა გვრცხვენოდეს?! ეს რა არის საერთოდ? გვაქვს საფუძვლიანი ეჭვი, რომ ამ ამბის მიჩქმალვა უნდათ და თაროზე შემოდება, რის უფლებასაც არ მოგცემთ!", - წერს დაზარალებულის მეგობარი.
მომხდართან დაკავშირებით საქართველოს პროკურატურაში ამბობენ, რომ თბილისის პროკურატურამ უკვე დაიწყო გამოძიება სისხლის სამართლის კოდექსის 333-ე 1 ნაწილით, რაც სამსახურებრივი უფლებამოსილების გადამეტებას გულისხმობს და 19 137-ე მუხლით, გაუპატიურების მცდელობა.