,,რესპუბლიკური პარტია“ საქართველოს პრემიერ მინისტრის განცხადებას ეხმიანება, რომლის თანახმადაც, „საქართველოში სეკულარიზმი, თავისი კლასიკური გაგებით, უადგილოა“. პარტიის თავმჯდომარე ხათუნა სამნიძე აცხადებს, რომ გიორგი კვირიკაშვილმა უნდა განმარტოს, თუ ,,რატომ გასცდა ის კონსტიტუციას“.
,,ხელისუფლებამ კი გადახედოს ეკლესიასა და სახელმწიფოს შორის ურთიერთობის ჩარჩოებს და დაფინანსების წესს. საქართველოს კონსტიტუციის მე -9 მუხლის მიხედვით, ეკლესია დამოუკიდებელია სახელმწიფოსგან. ამავე მუხლის შესაბამისად, სახელმწიფოსა და ეკლესიას შორის კონსტიტუციური შეთანხმება სრულად უნდა შეესაბამებოდეს საერთაშორისო სამართლის საყოველთაოდ აღიარებულ პრინციპებსა და ნორმებს. მათ შორის ადამიანის ულებათა და ძირითად თავისუფლებათა სფეროში, "- განაცხადა ხათუნა სამნიძემ.
შეგახსენებთ, პრემიერ-მინისტრმა გიორგი კვირიკაშვილმა გუშინ სასტუმრო „სნოს“ გახსნაზე განაცხადა: „მიუხედავად იმისა, რომ დღეს სახელმწიფო და ეკლესია დამოუკიდებლები არიან, საქართველოში სეკულარიზმი თავისი კლასიკური გაგებით უადგილოა, და ვფიქრობთ, რომ ჩვენს ერში არსებობს მოდელი, რომელიც მსოფლიოში უნიკალურია".