„არ გამოვრიცხავთ, რომ პეკინის ქუჩაზე ცალმხრივი მოძრაობა იყოს”, - ამის შესახებ თბილისის მერმა დავით ნარმანიამ განაცხადა და დასძინა, რომ აღნიშნულთან დაკავშირებით შესაბამისი კვლევა მიმდინარეობს.
დედაქალაქის მერის თქმით, სარეაბილიტაციო სამუშაოები დაგეგმილი გრაფიკის მიხედვით მიმდინარეობს და პროცესი 10 სექტემბერს დასრულდება.
„თითქმის ყოველდღიურ რეჟიმში ვიკრიბებით და ვადევნებთ თვალყურს სამუშაოების მიმდინარეობას. სამუშაოები 24 საათიან რეჟიმში მიმდინარეობს. ამ თვის ბოლომდე ქუჩის მარჯვენა მხარეს ყველა ძირითადი სამუშაო დასრულდება, მოძრაობას გადავრთავთ მარცხენა მხარეს და სარეაბილიტაციო სამუშაოები მეორე მონაკვეთზე დაიწყება.
არ გამოვრიცხავთ, რომ პეკინის ქუჩაზე ცალმხრივი მოძრაობა იყოს, ამასთან ერთად, ვმუშაობთ იმაზე, რომ გაკეთდეს ცალკე ავტობუსების ხაზი, სადაც ავტობუსი უფრო სწრაფად და კომფორტულად გადაადგილდება. ვმუშაობთ ასევე ველობილიკებთან დაკავშირებით. გარდა ამისა, ჩვენ უკვე მოვამზადეთ გამწვანების კომპონენტი და პეკინის გამზირზე მწვანე ნარგავები დაირგვება“, - განაცხადა დავით ნარმანიამ.
