ევროსაბჭო საქართველოს ოკუპირებული ტერიტორიების შესახებ სპეციალურ ანგარიშს მოამზადებს და რეზოლუციას მიიღებს.
ევროსაბჭოს საპარლამენტო ასამბლეის იურიდიულმა კომიტეტმა ქართული დელეგაციის ინიცირებულ საკითხს მხარი დაუჭირა.
პარლამენტის თავმჯდომარის პირველი მოადგილე თამარ ჩუგოშვილი კომიტეტის ერთსულოვან მხარდაჭერას საზოგადოებრივთან საუბრისას მნიშვნელოვან გადაწყვეტილებად აფასებს.
„კომიტეტის მხარდაჭერა ძალიან მნიშვნელოვანი გადაწყვეტილება იყო. ეს მხარდაჭერა იყო ერთსულოვანი. მნიშვნელოვანია, რომ დელეგაციის მხარდაჭერაც იყო ერთსულოვანი, როგორც მმართველი, ასევე, ოპოზიციური პარტიის წარმომადგენლების მხრიდან.
წლებია, ევროსაბჭოს საპარლამენტო ასამბლეას რეზოლუციების სახით, მნიშვნელოვანი პოზიცია არ დაუფიქსირებია საქართველოს ოკუპირებულ ტერიტორიებთან დაკავშირებით. ძალიან მნიშვნელოვანია, რომ ასეთი რეზოლუცია შეიქმნას. ერთი მხრივ, ამ კუთხით არის მნიშვნელოვანი და მეორე მხრივ, იმიტომ, რომ აფხაზეთის და ე.წ. სამხრეთ ოსეთის ოკუპირებულ ტერიტორიებზე ჩვენ ფაქტობრივად, ვერცერთი საერთაშორისო ორგანიზაციისგან ვერ ვიღებთ ინფორმაციას, რეალურად რა ვითარებაა. ამიტომ, ევროსაბჭოს საპარლამენტო კომიტეტის გააქტიურება ამ მიმართულებით ჩვენთვის განსაკუთრებით მნიშვნელოვანია.
ასევე, რეზოლუციაში უნდა დაფიქსირდეს ეს პოლიტიკური გადაწყვეტილება და შემდგომ, ამ რეზოლუციის საფუძველზე უნდა მიეცეს ადამიანის უფლებათა კომისარს ამ ტერიტორიების მონიტორინგის საშუალება“, - განაცხადა თამარ ჩუგოშვილმა.