ვენეციის კომისია საკონსტიტუციო პროექტზე საბოლოო დასკვნას ოქტომბერში გამოაქვეყნებს, - ამის შესახებ ჟურნალისტებს პარლამენტის თავმჯდომარე ირაკლი კობახიძემ განუცხადა. მისი თქმით, საქართველოს პარლამენტმა სთხოვა ვენეციის კომისიას, რომ დასკვნა გამოქვეყნდეს საკონსტიტუციო პროექტის ორი მოსმენით მიღების შემდეგ ოქტომბერში, რათა ამ დასკვნაში აისახოს ის ცვლილებები, რომლებიც ბოლოს განხორციელდა.
კობახიძის თქმით, შესაბამისად, მესამე მოსმენით პარლამენტი კონსტიტუციაში შესატან ცვლილებებს ოქტომბერში მიიღებს.
„საბოლოო დასკვნა ქვეყნდება ახლა, თუმცა გამომდინარე იქედან, რომ ბოლო დღეების განმავლობაში შევიდა ცვლილებები, საბოლოო დასკვნაში ვერ ესწრება ამ ცვლილებების ასახვა. აქედან გამომდინარე, ჩვენ ვთხოვეთ ვენეციის კომისიას, რომ ორი მოსმენით მიღების შემდეგ, როდესაც გამოიკვეთება მთლიანად ტექსტი, კიდევ ერთი საბოლოო დასკვნა გადმოუგზავნოს საქართველოს პარლამენტს. საპარლამენტო განხილვები დაიწყება და ორი მოსმენა დასრულდება ამ თვის ბოლომდე, ოქტომბერში მესამე მოსმენით მივიღებთ კონსტიტუციას“, - განაცხადა კობახიძემ.
მისივე თქმით, დაპირება რჩება ძალაში და ვენეციის კომისიის ყველა რეკომენდაცია იქნება გათვალისწინებული.
