ის მოსამართლეები, ვინც სისტემის წნეხს უძლებდნენ, საუკეთესო ხუთეულშიც არ გაუშვეს, - განაცხადა საია-ს თავმჯდომარე ანა ნაცვლიშვილმა სტრასბურგის მოსამართლეობის კანდიდატებთან დაკავშირებით.
,,სტრასბურგის სასამართლოს მოსამართლეობის საუკეთესო ხუთეულში საკმაოდ ბევრი ძლიერი კანდიდატი ვერ მოხვდა, მაგალითად ნინო ბაქაქური. სასამართლოს და ხელისუფლების გუშინდელი გზავნილი პირდაპირია, რომ მორჩილი მოსამართლეები, ვინც ასრულებდნენ და ასრულებენ დაკვეთებს, კიდევ შეასრულებენ. მათ ხელისუფლება დააწინაურებს და სტრასბურგშიც გაუშვებს. ის მოსამართლეები კი, ვინც სისტემის წნეხს უძლებდნენ, საუკეთესო ხუთეულშიც კი არ გაუშვეს", - აღნიშნა ანა ნაცვლიშვილმა.
ყველაზე მაღალი ქულები ლადო ჭანტურიამ, სოფიო ჯაფარიძემ, შოთა გეწაძემ, თამარ ალანიამ და ირაკლი დონდოლაძემ მიიღეს.
მთავრობა 3 კანდიდატს შეარჩევს და ევროპული საბჭოს საპარლამენტო ასამბლეის ადამიანის უფლებათა ევროპული სასამართლოს მოსამართლის ამრჩევ კომიტეტს წარუდგენს (საბოლოო ვადა 31 აგვისტო). კენჭისყრა ევროპული საბჭოს საშემოდგომო სესიაზე, ოქტომბერში ჩატარდება.
ახალი მოსამართლის არჩევამდე, სტრასბურგის სასამართლოში საქართველოს მოსამართლე ნონა წოწორიაა.
