ხშირად მეუბნებიან, რომ წარსულზე არ უნდა ვისაუბროთ. ეს არასწორია. ჩემთვის პრციოულად მნიშვნელოვანია, რომ კარგად გავიაზროთ წარსულის შეცდომები, სხვანაირად, ვერ გამოვასწორებთ მათ და ვერ შევქმნით მომავალს, რომლისაც სჯერა ჩვენს მოსახლეობას, - ამის შესახებ "ევროპული საქართველოდან" თბილისის მერობის კანდიდატმა ელენე ხოშტარიამ პარტიის ყრილობაზე, სიტყვით გამოსვლისას განაცხადა.
მისი თქმით, კამპანია უნდა იყოს კონკრეტული პრობლემების კონკრეტული შეთავაზებები და პრობლემების გადაწყვეტის გზები. როგორ არ ეშინოდეთ პენსიონერებს სიბერის, როგორ შეძლონ ახალგაზრდებმა თავიანთი ნიჭის რეალიზება, როგორ მოხდეს ისე, რომ შშმ ადამიანებმა, ბოლოსდაბოლოს, თავი იგრძნონ საზოგადოების სრულფასოვან წევრებად, როგორ მოხდეს ისე, რომ უმცირესობებს არ ეშინდოეთ გარეთ გამოსვლის, იმიტომ, რომ მათ თავს დაესხმებიან. მისივე თქმით, ეს არის მთავარი ამოცანა და არა ვიღაცასთან ჯიბრი და კინკლაობა.
როგორც ხოშტარიამ აღნიშნა, ძალა არის არა სხვის მარცხში, არამედ რწმენაში, იდეებსა და შეთავაზებებში.
"დღეს მე ვიღებ პასუხისმგებლობას, რომ ვიბრძოლო ქალაქის მერობისთვის. არ მინდა, ქალაქის მმართველობა იყოს პოლიტიკური ბრძოლის, კინკლაობის ველი. მთავარია, რომ მერი ემსახურებოდეს მოსახლეობას, ანგარიშს აგებდეს მოსახლეობის და არა რომელიმე ერთი ჯგუფის, პარტიის ან თუნდაც ნებისმიერი ერთი ადამიანის წინაშე. ამიტომ, მე ვდებ გულწრფელ პირობას, რომ ერთადერთი, ვის წინაშეც მე ვიქნები ანგარიშვალდებული, ეს არ იქნება არც პარტია, არც არავინ, ეს იქნება ხალხი. და ვერც ბიურაკრატიული კედლები, ვერც დაბურული შუშები, ვერც მიუწვდომელი კაბინეტები ვერ ჩადგება ჩვენ შორის", - განაცხადა ელენე ხოშტარიამ.
