ავიაკომპანია Turkish Airlines -ის (THY) წარმომადგენელმა ილკერ აიჯიმ სტამბოლის მესამე აეროპორტის პროექტს საკმაოდ მაღალი შეფასება მისცა.
Global Media Forum-2017-ზე სიტყვით გამოსვლისას, აიჯიმ განაცხადა, რომ დარწმუნებულია სტამბოლის რიგით მესამე აეროპორტი, რომელიც იმავდროულად მსოფლიოში ყველაზე დიდი აეროპორტი გახდება, თურქეთის ავიაციის კიდევ უფრო მეტად განვითარებაში მნიშვნელოვან წვლილს შეიტანს.
„მეგა პროექტია. ის უფრო მეტია ვიდრე აეროპორტი. ის თურქეთს დანარჩენ მსოფლიოსთან კიდევ უფრო დაახლოებს და საკუთარ წვლილს შეიტანს ვაჭრობისა და ტურიზმის განვითარებაში“, განაცხადა Turkish Airlines -ის (THY) წარმომადგენელმა.
აეროპორტის მშენებელი კომპანია İGA Havalimanları İnşaatı-ს ხელმძღვანელის იუსუფ აკჩაიოღლუს განმარტებით, აეროპორტის მშენებლობა საკმაოდ აქტიური ტემპით მიმდინარეობს და რაც მთავარია მშენებლობის პროცესი უწყვეტია და ის 24 საათიან რეჟიმში წარმოებს.
აეროპორტის მშენებლობის პირველი ეტაპი 2018 წლის 26 თებერვლამდე დასრულდება. პირველი ეტაპის ბიუჯეტი 6 მლრდ ევროა.
ახალი აეროპორტი დღე-ღამეში 2 ათასი თვითმფრინავის მიღებას შეძლებს. სტამბოლის მესამე აეროპორტიდან რეისები მსოფლიოს 350 ქალაქის მიმართულებით განხორციელდება.
ცნობილია, რომ აეროპორტს მსოფლიოში ყველაზე დიდი პარკინგი ექნება, რომელიც 18 ათას ავტომობილზე იქნება გათვლილი.
აეროპორტის სადისპეჩერო ანძა კი ტიტის ფორმისა იქნება.
სტამბოლს ამ დროისათვის ორი: ათათურქის სახელობის საერთაშორისო აეროპორტი და საბიჰა გოგჩენის საერთაშორისო აეროპორტი ემსახურება. სტამბულის ახალი აეროპორტის მშენებლობის შესახებ გადაწყვეტილება ჯერ კიდევ 2013 წელს იქნა მიღებული. აეროპორტის მშენებლობის ტენდერი "Limak-Kolin-Cengiz-MaPa-Kalyon"-მა მოიგო, რომელმაც პროექტი 22,1 მლრდ დოლარად შეაფასა. აღნიშნული აეროპორტი თავდაპირველად წელიწადში 90 მლნ მგზავრს მოემსახურება, ხოლო შემდგომ გამტარუნარიანობა 150 მლნ მგზავრამდე გაიზრდება.
სტამბულში მესამე აეროპორტი, რომელიც ტერკოსის ტბის მიმდებარედ შენდება, მსოფლიოში ერთ-ერთი უდიდესი აეროპორტი იქნება და ის თურქეთის პრეზიდენტის, რეჯებ ტაიპ ერდოღანის სახელობის იქნება.
იმავდროულად თურქეთის მთავრობა 66 კმ-იანი მეტროს ხაზის გაყვანას გეგმავს, რითაც ქალაქი სტამბოლის ახალ აეროპორტს დაუკავშირდება. მეტროს ხაზი 13 გაჩერებას გააერთიანებს. მეტროს ხაზის მშენებლობის პირველი ეტაპი 2018 წელს დაიწყება, ხოლო მეორე - 2021 წელს. წინასწარი გათვლებით პროექტის ბიუჯეტი 4,85 მლრდ თურქული ლირაა.
მეტროს ახალი ხაზი მგზავრს საშუალებას მისცემს აეროპორტში 30 წუთში მოხვდეს.
