სახელმწიფო აუდიტის სამსახურის უფროსი ლაშა თორდია არასამთავრობო ორგანიზაციებს შეხვდა. შეხვედრის შემდეგ იგი ჟურნალისტებს ესაუბრა და განაცხადა, რომ გამოძიება არასწორი მუხლითაა დაწყებული მისი თქმით, უკანასკნელი განცხადებები აჩვენებს, რომ ფარცხალაძეს და მის ადვოკატებს საქმის წაყვანა სხვა მიმართულებით სურთ.
„დაიწყეს უაზრო საუბრები წამიერ შეხვედრაზე. დაახლოებით ერთი წუთი გრძელდებოდა ჩხუბი და 12 რაუნდი არ მიჩხუბია, 10 წამში შემიძლია მე, მარტომ ფარცხალაძეს და მის ადვოკატს დავმართო ჩემზე უარესი, რაც მათ დამმართეს. საუბრობენ იმაზე, რომ გავედი საპირფარეშოში, თავი ვურტყი კედელს და დაზიანებები თვითონ მივიღე, ეს არის აბსურდის თეატრი, ცირკი, რომელსაც ოთარ ფარცხალაძე თავისი ადვოკატების საშუალებით ალაგებს. სპეციალურად გამოძიება არის იმ მუხლით, რომ არ მოხდეს კამერების ჩანაწერების ამოღება, რადგან გავიდეს დრო და ამ კამერების ჩანაწერები წაიშალოს. ეს არის ჩემი ერთადერთი მტკიცებულება. მათი მოწმეები იქნებიან ის ადამიანები, რომლებზეც მოახდნენ ზეწოლას, რადგან ჩემი ინფორმაციით, ფარცხალაძის მაგიდაზე, გარდა მიშა ჩოხელისა, იყო კიდევ ფინანსური პოლიციის ხელმძღვანელობა, მოადგილე, საგამოძიებოს უფროსი და ყველა ის ადამიანი, ვისაც ხელეწიფება ზეწოლის მოხდენა. ეს ადამიანები თავს გადაირჩენენ ყველანაირი ფორმით", - განაცხადა ლაშა თორდიამ.
