ეს შეიძლება დაეხმაროს სწორედ, რეფორმის პროცესში მყოფ მართლმსაჯულებას, რომ ერთი მხრივ, გამოხატვის თავისუფლების სტანდარტები იყოს დამკვიდრებული მყარად და კარგად, და მეორე მხრივ, დავიცვათ სასამართლო იმ ტიპის ზეწოლებისა და შეურაცხყოფებისგან, რომელიც სცილდება გამოხატვის თავისუფლებას, - ამის შესახებ იურიდიულ საკითხთა კომიტეტის თავმჯდომარე ეკე ბესელიამ იმ ინიციატივის შეფასებისას განაცხადა, რომლის თანახმადაც, მოსამართლის შეურაცხყოფისთვის სანქციები უნდა გამკაცრდეს.
მისი თქმით, არავინ აპირებს გამოხატვის თავისუფლება შეზღუდოს იმაზე მეტად, რაზეც თავად ევროკონვენციაშია დათქმა. მისივე განცხადებით, აქ საუბარია, არა კრიტიკის დაუშვებლობაზე, არამედ სასამართლოზე ზეწოლის, ან სასამართლოს მიმართ დაუშვებელი და კანონის მიღმა განხორციელებული შეურაცხყოფის ფაქტებზე რეაგირების თაობაზე.
„არავინ აპირებს გამოხატვის თავისუფლება შეზღუდოს იმაზე მეტად, რაზეც თავად ევროკონვენციაშია დათქმა. აქ საუბარია, არა კრიტიკის დაუშვებლობაზე, არამედ სასამართლოზე ზეწოლის, ან სასამართლოს მიმართ დაუშვებელი და კანონის მიღმა განხორციელებული შეურაცხყოფის ფაქტებზე რეაგირების თაობაზე. კანონი ამას ითვალისწინებს და, რა თქმა უნდა, პრაქტიკაც არსებობს.
სასამართლო კორპუსი დღეს საუბრობს, რომ დასაშვებ ზღვარს სცდება ის შეურაცხყოფები, რაც არის კონკრეტული მოსამართლეების მიმართ. ისინი ამ დისკუსიას საჯაროს ხდიან და ეს საუბარი არ არის ცუდი პროცესი. ეს შეიძლება დაეხმაროს სწორედ, რეფორმის პროცესში მყოფ მართლმსაჯულებას, რომ ერთი მხრივ, გამოხატვის თავისუფლების სტანდარტები იყოს დამკვიდრებული მყარად და კარგად, და მეორე მხრივ, დავიცვათ სასამართლო იმ ტიპის ზეწოლებისა და შეურაცხყოფებისგან, რომელიც სცილდება გამოხატვის თავისუფლებას“, - აღნიშნა ეკა ბესელიამ.