„შრომის ინსპექციას არ აქვს უფლება შევიდეს ობიექტებზე თუკი კომპანია არაა თანახმა“,- განუცხადა „ჯი-ეიჩ-ენს“ მშენებელთა და ტყის მუშაკთა დამოუკიდებელი პროფესიული კავშირის თავმჯდომარე მარინა კურტანიძემ. მისი თქმით, თუკი არსებობს კონკრეტულ კომპანიაში შესვლის სურვილი, ინსპექცია ვალდებულია, რომ 5 დღით ადრე შეატყობინოს მათ.
რამოდენიმე დღის წინ, სამშენებლო სამუშაოზე მომუშავე 21 წლის ახალგაზრდა დაიღუპა. კურტანიძის თქმით, ამ სფეროში შრომის უსაფრთხოების მდგომარეობა სავალალოა.
„2011 წლის შემდგომ სამშენებლო სამუშაოებზე დაიღუპა 300-მდე და მძიმედ დაშავდა 700-მდე ადამიანი. ეს საკითხი მისახედია და სახელმწიფოს მხრიდან საჭიროა ქმედითი ღონისძიებების განხორციელება.
წლებია პროფკავშირები ვსაუბრობთ და ჟურნალისტები აშუქებენ ყველა შემთხვევას, მაგრამ შედეგი არ იცვლება და იზრდება შემთხვევათა ტენდენცია“,-განაცხადა მარინა კურტანიძემ „ჯი-ეიჩ-ენთან“.
მან საკითხის მოგვარების გზებზეც ისაუბრა და განაცხადა, რომ პირველ რიგში საჭიროა შესაბამისი კანონმდებლობის შექმნა და სახელმწიფოსვე შექმნილი შრომის ინსპექციისთვის უფლებების გაზრდა.
„სახელმწიფოს მხრიდან წინ გადადგმული ნაბიჯია, რომ შეიქმნა შრომის დეპარტამნეტი, რომელსაც ჩვენ შრომი სახელმწიფო ინსპექციას ვუწოდებთ. თუმცა იგი ვერ ახორციელებს თავის ფუნქციას, რადგან მას არ აქვს მთელი რიგი უფლებები და სანქციათა გამოყენების შესაძლებლობა, სპეციფიკის მიხედვით კი კადრების დეფიციტია“,- განაცხადა მარინა კურტანიძემ.