ბათუმში, თამარ მეფის გამზირზე ციტრუსის დეკორატიული ხეები დაირგო. გამწვანების აქციაში მონაწილეობდნენ აჭარის სოფლის მეურნეობის მინისტრი ლაშა კომახიძე, მინისტრის მოადგილე რუსლან ქორიძე, ბათუმის მერი გიორგი ერმაკოვი, აგროსერვის ცენტრის დირექტორი გოჩა ბერიძე, გამწვანებისა და ლანდშაფტური დაგეგმარების სამსახურის უფროსი ლევან ჭანუყვაძე, მერიისა და გამწვანების სამსახურის თანამშრომლები.
1500-მდე ძირი დეკორატიულ ციტრუსოვანი მცენარე მუნიციპალიტეტს აჭარის სოფლის მეურნეობის სამინისტროს ა(ა)იპ აგროსერვის ცენტრმა გადასცა. 111 ძირი ხე უკვე დაირგო ლეხ და მარია კაჩინსკების ქუჩაზე, თამარ მეფის გამზირზე კი 52 ძირი დეკორატიული ციტრუსია დარგული. ციტრუსოვანთა ხეივნის გაშენება ქალაქის სხვადასხვა უბანში გაგრძელდება.
აქცია დედამიწის დღესთან დაკავშირებით მოეწყო, რომელიც მთელი მსოფლიოს მასშტაბით 22 აპრილს აღინიშნება. დედამიწის დღისადმი მიძღვნილი აქციები ხვალაც გაიმართება.