საოკუპაციო რეჟიმის მიერ საქართველოს მოქალაქეების დაკავებას ვანდალურ ქმედებას უწოდებს საქართველოს საგარეო საქმეთა მინისტრის მოადგილე.
დავით ჯალაღანიას თქმით, ადგილი აქვს ადამიანის უფლებების დარღვევას და ქართული მხარე შესაბამის ნაბიჯებს დგამს.
„შეურიგებელია ეს მდგომარეობა, გარემოება, როდესაც ხდება თავისუფალი მოქალაქეების გატაცება. ეს არის სხვადასხა მიზნით. მე ვიტყოდი, კომერციული თუ ადგილობრივი სხვა სახის. ამაზე არის მკაცრი რეაგირება. არის წარმატებული შემთხვევით როდესაც საერთო ძალიხმევით ხდება ამ ადამიანების გამოყვანა დაკავებული ტერიტორიებიდან“, - განაცხადა დავით ჯალაღანიამ.
შეგახსენებთ, ტყვეობაში გორის რაიონის სოფელ არცევის სამი მკვიდრია, რომლებიც რუსმა სამხედროებმა მავთულხლართებს მიღმა მოქცეული სასაფლაოდან წაიყვანეს. ე.წ. საზღვრის უკანონოდ გადაკვეთის ბრალდებით დაკავებულთა გასათავისუფლებლად მოლაპარაკებები მიმდინარეობს.
