,, პროცესი, რომელიც საკონსტიტუციო სასამართოს დისკრედიტაციას იწვევს, მალე დასრულდება“, - განაცხადა დღეს გამართულ პრესკონფერენციაზე ”ქართული ოცნების” აღმასრულებელმა მდივანმა ირაკლი კობახიძემ. მისი შეფასებით, გიორგი პაპუაშვილს არ აქვს უმრავლესობა სასურველი გადაწყვეტილების მისაღებად და ამიტომ არ ტარდება პლენუმის სხდომა.
,,საკონსტიტუციო სასამართლო, არის ერთგვარი მწვერვალი იურისპრუდენციის იმ განვითარებულ ქვეყნებში, სადაც თავს იყრიან ის მოსამართლეები, რომლებიც გამოირჩევიან თავისი განსაკუთრებული რეპუტაციით, კვალიფიკაციით და საქმის პატივისცემით. ამის ფონზე, ძალიან მძიმე სანახავია ის პროცესები, რაც ჩვენს საკონსტიტუციო სასამართლოში ვითარდება. 2012 წლამდე ეს ორგანო იყო ძალიან პასიური 2012 წლის შემდეგ გააქტიურდა, რისი საფუძველიც არის ის, რომ კონკრეტული მოსამართლეები დაქვემდებარებული არიან პოლიტიკურ კონიუნქტურას. განსაკუთრებულ აქცენტს გავაკეთებ ბოლო პროცესებზე, რაც შეეხება სარჩელის შეცვლას, შეიცვალა სარჩელი და ეს შეიცავს მძიმე გადაცდომის ნიშნებს. ამ შემთხვევაში დაირღვა კანონი, რაც არის ძალიან მძიმე გადაცდომა. ეს შეიძლება კონკრეტული დანაშაული ნიშნებს შეიცავდეს და საჭიროა სამართლებრივი პოზიციის ჩამოყალიბება“, - განაცხადა კობახიძემ.
მისი თქმით, ასევე მძიმე გადაცდომას წარმოადგენს 23 აგვისტოს მომხდარი შემთხვევაც, როცა უნდა დადებულიყო პირველ გადაცდომაზე დასკვნა და უნდა გამართულიყო პლენუმის სხდომა, ორ განსხვავებულ დასკვნასთან დაკავშირებით, რომელიც გაუგებარი მიზეზებით გადაიდო.
”ჩნდება კონკრეტული ეჭვი, რომ გიორგი პაპუაშვილი დარწმუნდა, რომ მას არ ჰქონდა უმრავლესობა, რაც საშუალებას მისცემდა, რომ მისთვის სასარგებლო დასკვნა დაფიქსირებულიყო პლენუმის მიერ და ამის გამო მოხდა პლენუმის სხდომის ჩაშლა. არსებობს რისკი, რომ შეიძლება ”ნაციონალურმა მოძრაობამ” სცადოს, მისი გავლენის ქვეშ მყოფი მედიასაშუალებების მიერ განახორციელოს ზეწოლა ამ მოსამართლეებზე, რათა შეძლოს რაიმე ფორმით მათი სასურველი დასკვნის მიღება”, - განაცხადა კობახიძემ, თუმცა დასძინა, რომ პროცესი, რომელიც საკონსტიტუციო სასამართოს დისკრედიტაციას იწვევს, მალე დასრულდება.