ოდესის ოლქის გიბერნატორმა, საქართველოს ყოფილმა პრეზიდენტმა ,,რუსთავი 2“ -სთვის მიცემულ ინტერვიუში იმ შეცდომებზე ისაუბრა, რომელმაც მის გუნდს 2012 წელს არჩევნები წააგებინა. მისი თქმით, ბათუმში მთავარი ჩავარდნა იყო ის, რომ ძალიან ბევრმა ადამიანმა ვერ იგრძნო თავი ამ ყველაფრის ნაწილად.
,,ბათუმში მთავარი ჩვენი შეცდომა, მთავარი ჩავარდნა იყო ის, რომ ძალიან ბევრმა ადამიანმა ვერ იგრძნო თავი ამ ყველაფრის ნაწილად. ადამიანებს ენატრებოდათ ის დრო, როცა მათი წარმოდგენით მათი აზრი უფრო მნიშვნელოვანი იყო. ხალხის გამტყუნება აქ არ შეიძლება. ძალიან მნიშვნელოვანია, რომ ჩვენ ახალი ენერგიით მაგრამ ბევრად უფრო რბილი და ხალხის ჩართულობის მეთოდებით, დავბრუნდეთ. ეს არ უნდა იყოს ძველის დაბრუნება, არამედ ახლის შექმნა. ხალხმა უნდა იცოდეს, რომ ჩვენ შევიცვალეთ და ბევრი რამ ვისწავლეთ'', - აღნიშნა სააკაშვილმა.
მისივე თქმით, ოპოზიციაში ყოფნის 4 წელი საკმარისი იყო იმისთვის, რომ გაეანალიზებინა პოლიტიკური პროცესები. სააკაშვილი ამბობს, რომ რეფორმებისა და მშენებლობის მასშტაბური ტემპების გამო ხშირ შემთხვევაში არ ხდებოდა მოსახლეობის აზრის გათვალისწინება და მათთვის სათანადოდ ახსნა, თუ რას ემსახურებოდა ესა თუ ის რეფორმა ან სახელმწიფო პროექტი.
სააკაშვილის განცხადებით, ენმ-მ ხელისუფლებაში მოსვლის შემდეგ, ყოველი მისი გადადგმული ნაბიჯი სათანადოდ უნდა აუხსნას მოსახლეობას და ,,ეს ასეც იქნება“.