გიგა ოთხოზორიას მკვლელის დაკავების შესახებ ქართულ მხარეს ზუსტი ინფორმაცია არ აქვს. თუმცა, როგორც ჟურნალისტებს სახელმწიფო მინისტრმა, პაატა ზაქარეიშვილმა განუცხადა, საკმაოდ სანდო ინფორმაციით, მკვლელობაში ბრალდებული აფხაზეთის ტერიტორიაზე იმყოფება.
„ინფორმაცია ზუსტი არ გვაქვს, ინტერპოლის აღრიცხვაზე თუ იქნება, როგორც კი ინტერპოლის არეალში მოყვება და რომელიმე სახელმწიფოს საზღვარი გადალახა, ინტერპოლი დაიწყებს ძებნას, თუმცა ამ მიმართულებით ჯერ პასუხი არ გვაქვს. ნებისმიერი ფორმა, ნებისმიერი მეთოდი ამ ადამიანის დაკავებისთვის არის გამართლებული. დღევანდელ სხდომაზე ითქვა, რომ არ ადასტურებენ დაპატიმრებას. „არ დასტურებენსა“ და „არდაპატიმრებას“ შორის დიდი განსხვავებაა. ითქვა, რომ საქმე აღძრა ე.წ. სამხედრო პროკრუატურამ, ხოლო სამხედრო პროკურატურის წარმომადგენლები არ იმყოფებოდნენ გალის დღევანდელ შეხვედრაზე. პასუხებში ჩანს გარკვეული გამოსავლის დატოვების მცდელობები. როცა პოლიტიკაში ვართ და დაინტერესებულები ვართ, რომ გამოძიება დასრულდეს მკლველის დასჯით, კეთილი უნდა ვინებოთ და ეს გამოსავლები დავინახოთ. თუმცა, ჩვენ ვხედავთ შუალედურ ვარიანტს, რომ ეძებენ გამოსავალს“,-აღნიშნა პაატა ზაქარეიშვილმა.
მისივე თქმით, საკუთარი ინფორმაციის წყაროებიდან გამომდინარე, აქვს საფუძვლიანი მოლოდინი, რომ აფხაზები გიგა ოთხოზორიას მკვლელობის საქმეს არ დახურავენ, არ მიაჩუმათებენ და ამ ეჭვმიტანილს, მკვლელია, მაგრამ მაინც ეჭვმიტანილს, არ დამალავენ და არ გააპარებენ.
