დღეს საღამოს, კანის 63-ე საერთაშორისო კინოფესტივალი რიდლი სკოტის "რობინ ჰუდით" გაიხსნება, სადაც მთავარ როლებს რასელ ქროუ და კეიტ ბლანშეტი ასრულებენ.
საგანგებოდ მოწყობილ წითელ ხალიჩაზე უკვე გაიარეს კანში ჩასულმა ვარსკვლავებმა, მათ შორის: ჰელენ მირენმა; ვუდი ალენმა; ევა ლონგორიამ; აიშვარია რაიმ; სელმა ჰაიეკმა; ანჯელინა ჯოლიმ; შონ პენმა; ნაომი ვოტსმა; ჯან-ლუკ გოდარდრმა და სხვებმა.
კანის კინოფესტივალის ჟიურის ცნობილი ამერიკელი რეჟისორი და კინოში გოთიკური სტილის ერთ-ერთი დამამკვიდრებელი ტიმ ბარტონი უხელმძღვანელებს. ბარტონთან ერთად ჟიურიში კეით ბეკინსეილი; ბენისიო დელ ტორო და ინდოელი რეჟისორი და მსახიობი შახარ კაპური შედიან.
ფესტივალის ჟიური გამარჯვებულს 19 ძირითადი ფილმიდან აარჩევს და ოქროს პალმის რტოს გადასცემს.
ჟიურის გადაწყვეტილება 23 მაისს გახდება ცნობილი. ტიმ ბარტონის განცხადებით, მისთვის კანის კონოფეტივალის თავმჯდომარეობა ძალიან საინტერესოა, რადგან ნახავს ისეთ ფილმებს, რომლებსაც თავად არასდროს გადაიღებდა.
კინოფესტივალზე არასაკონკურსო ჩვენებაში ასევე წარმოდგენილი იქნება ვუდი ალენის "შენ შეხვდები მაღალ შავგვრემან უცნობს" (მთავარ როლში ნაომი ვოტსი) და ოლივერ სტოუნის "ვოლ სტრიტი: ფულს არასდროს სძინავს."
შეგახსენებთ, რომ კანის კინოფესტივალზე რენე ჰარლენის "ჯეორჯიას" დახურული, არასაკონკურსო ჩვენებაც გაიმართება, რომელიც საქართველო-რუსეთის 2008 წლის ომის თემას ეხება.
