22 ივნისს, საქართველოს ეკონომიკისა და მდგრადი განვითარების სამინისტროს სსიპ მეწარმეობის განვითარების სააგენტოს დირექტორმა, გიორგი ციკოლიამ გერმანიის საერთაშორისო თანამშრომლობის საზოგადოების (GIZ) წარმომადგენელთან, ქალბატონ ფელიციტას ზიკთან ერთად გერმანიის ეკონომიკური გაერთიანების (DWV) ორგანიზებით გამართულ ფორუმში მიიღო მონაწილეობა.
ფორუმის მსვლელობისას, მხარეთა საუბარი შეეხო საქართველოსა და გერმანიის მეწარმეობის ხელშეწყობასთან დაკავშირებულ სამთავრობო ინიციატივებს, რომლის ფარგლებშიც მეწარმეობის განვითარების სააგენტოს დირექტორის მხრიდან დეტალურად იქნა განხილული სააგენტოს საქმიანობა, მიმდინარე პროექტები და პრიორიტეტული მიმართულებები. მათ შორის, ყურადღება გამახვილდა საქართველოს ეკონომიკისა და მდგრადი განვითარების სამინისტროს მიერ ინიცირებულ პროგრამაზე „აწარმოე საქართველოში“ და თითოეული კომპონენტი ამომწურავად განიმარტა.
გარდა ამისა, ღონისძიების ფარგლებში ქალბატონმა ზიკმა გერმანიის ფედერალური რესპუბლიკის ეკონომიკური თანამშრომლობისა და განვითარების სამინიტროს (BMZ) პროგრამა წარმოადგინა, რომელიც ქართულ და გერმანულ ბიზნესებს შორის კავშირების გაღრმავებას ისახავს მიზნად და ორ ქვეყანას შორის თანამშრომლობის განმტკიცებას ემსახურება.