"ქრისტიან - დემოკრატიული" პარტიის ლიდერმა შარშანდელი აპრილის გამოსვლები გაიხსენა და აღნიშნა, რომ ქართულ პოლიტიკას ძალიან მოკლე მეხსიერება აქვს, ამის მაგალითად თარგამაძეს იმ პოლიტიკოსების განცხადებები მოყვას, რომლებიც ამბობდნენ, რომ ცოცხალი თავით სააკაშვილის პრეზიდენტობას არ შეეგუებოდნენ და შიმშილობის თუ სხვა მეთოდოლოგიის საშუალებით პრეზიდენტის სავარძელს გაათავისუფლებდნენ. ამის შესახებ "ქრისტიან - დემოკრატიული" პარტიის ლიდერმა დღეს, "პრაიმ ტაიმის" პრეს-კლუბში, ჟურნალისტებთან შეხვედრის დროს ისაუბრა.
თარგამაძის თქმით, მიტინგების ორგანიზატორმა პოლიტიკურმა ლიდერებმა თავიანთ საქციელსა და განცხადებებზე პასუხი უნდა აგონ და ეს არჩევნებში მოხდება.
"რატომღაც ყველას მარტივად დაავიწყდა საკუთარი განცხადებები, მოწოდებები, ტყუილები. ერთხელ და სამუდამოდ ამ ქვეყანაში ადამიანებმა თავიანთ შეცდომებზე პასუხი უნდა აგონ და ასეც მოხდება - არჩევნების დროს. იმედი მაქვს, რომ საზოგადოებას ყველაფერი კარგად ახსოვს", - აღნიშნა თარგამაძემ.
