სირიის ეროვნულმა კოალიციამ დაასახელა ის პირობები, რომელთა შესრულების შემთხვევაშიც სირიის კონფლიქტის დარეგულირების მიზნით ჟენევაში დაგეგმილ საერთაშორისო კონფერენციაში მიიღებს მონაწილეობას. ამის შესახებ ინფორმაციას სააგენტო „როიტერი" ავრცელებს.
ოპოზიციური ძალები მოითხოვენ, რომ კონფერენციის ფარგლებში დასახელდეს კონკრეტული ვადები ქვეყანაში მიმდინარე კონფლიქტის დასრულებასა და ბაშარ ასადის გადადგომასთან დაკავშირებით. ეროვნული კოალიციის მიერ გავრცელებულ განცხადებაში ასევე ნათქვამია, რომ სირიის ოპოზიციური ძალა მიესალმება საერთაშორისო თანამეგობრობის ძალისხმევას კონფლიქტის პოლიტიკური გზით დასასრულებლად. კონფლიქტის დასრულების უმთავრეს პირობად კოალიცია ბაშარ ასადის, მისი რეჟიმის მაღალი თანამდებობის პირების, უმაღლესი მთავარსარდლობისა და ქვეყნის უსაფრთხოების ძალების წასვლას ასახელებს.
შეგახსენებთ, რომ სირიაში ხელისუფლებასა და ოპოზიციას შორის მიმდინარე კონფლიქტის დარეგულირებისა და სამშვიდობო პროცესის დაწყების მიზნით, ამერიკის შეერთებული შტატები და რუსეთის ფედერაცია საერთაშორისო კონფერენციის მოწვევაზე შეთანხმდნენ. კონფერენცია ჟენევაში გაიმართება და მასში მონაწილეობის სურვილი უკვე გამოთქვა მრავალმა ქვეყანამ, მათ შორისაა ოფიციალური დამასკო.
სამოქალაქო დაპირისპირება სირიაში და კონფლიქტი ხელისუფლებასა და ოპოზიციას შორის უკვე თითქმის ორი წელია გრძელდება. ამ ხნის განმავლობაში, გაეროს მონაცემებით დაიღუპა 80 ათასზე მეტი ადამიანი, ხოლო 1,5 მილიონზე მეტი ლტოლვილად იქცა.