ჩვენ ხშირად გვესმის, რომ საქართველოს თითქოს არჩევანის გაკეთება უწევს საკუთარი იდენტობის შენარჩუნებასა და ევროინტეგრაციას შორის, არ გიწევთ ასეთი არჩევანის გაკეთება, ეს ყალბი დილემაა, – ამის შესახებ საქართველოში ევროკავშირის ელჩმა, პაველ ჰერჩინსკიმ წმ. ანდრიას ქართულ უნივერსიტეტში(SANGU) განაცხადა, სადაც მასწავლებლის საერთაშორისო დღესთან დაკავშირებით იმყოფებოდა.
„ჩემი გულწრფელი მილოცვა მასწავლებლებს. თქვენი პროფესია უაღრესად მნიშვნელოვანია. მასწავლებლების მიმართ განსაკუთრებული პირადი დამოკიდებულება მაქვს, რადგან დედაჩემი და მამაჩემი მასწავლებლები იყვნენ. SANGU აჩვენებს, რომ შესაძლებელია, იყო ძალიან ტრადიციული, მაგრამ ამავდროულად იყო ღია, თანამედროვე და გქონდეს საერთაშორისო კავშირები. ვფიქრობ, ეს თავად „სანგუ“-ს მიღმაც მნიშვნელოვანი გზავნილია. ჩვენ ხშირად გვესმის, რომ საქართველოს თითქოს არჩევანის გაკეთება უწევს საკუთარი იდენტობის შენარჩუნებასა და ევროინტეგრაციას შორის. არ გიწევთ ასეთი არჩევანის გაკეთება. ეს ყალბი დილემაა. როგორც „სანგუ“-სთვის, ისევე მთლიანად საქართველოსთვის, შესაძლებელია, იყო ტრადიციული და ღრმად ქრისტიანული, ამავე დროს კი, ღია გარე სამყაროსთვის და მიიღო სარგებელი ევროინტეგრაციისგან“, – განაცხადა ელჩმა.
