სტამბოლის ბაშაქშეჰირის რაიონში მდებარე სკოლაში დანით თავდასხმის შედეგად ერთი მოსწავლე დაიღუპა, შვიდი კი დაშავდა. თავდაპირველად დაშავებულთა რაოდენობა რვა იყო, თუმცა ერთ-ერთი მათგანი მოგვიანებით საავადმყოფოში გარდაიცვალა.
გავრცელებული ინფორმაციით, თავდასხმის შედეგად 10-დან 13 წლამდე ასაკის რვა მოსწავლე დაშავდა.
თურქული მედიის ცნობით, თავდასხმაში ეჭვმიტანილი 15 წლის გოგოა, რომელიც სხვა სკოლაში მე-10 კლასში სწავლობს. ის შემთხვევის ადგილზე პოლიციამ დააკავა.
თურქეთის ჯანდაცვის მინისტრის, ქემალ მემიშოღლუს განცხადებით, თავდასხმის შემდეგ რვა დაშავებული საავადმყოფოში გადაიყვანეს, მათგან ერთი კრიტიკულ მდგომარეობაში იყო, ორი კი საშუალოდ მძიმე მდგომარეობაში.
თურქეთის განათლების მინისტრმა იუსუფ თექინმა მოგვიანებით დაადასტურა, რომ ერთ-ერთი დაშავებული მოსწავლე გარდაიცვალა. მომხდარზე გამოძიება დაიწყო, სკოლაში კი სასწავლო პროცესი ორი დღით შეჩერდა.
