პროკურატურის უფლებამოსილებების იუსტიციის სამინისტროსგან გამიჯვნის საკითხზე პარლამენტში ახალი საკანონმდებლო ინიციატივა შევიდა. "პროკურატურის შესახებ" კანონპროექტის ინიცირება ბიუროს გუშინდელ სხდომაზე მოხდა. პარლამენტის თავმჯდომარის, დავით უსუფაშვილის განცხადებით, კანონპროექტის განხილვა მიმდინარე კვირას დაიწყება. "პროკურატურის შესახებ" ახალი საკანონმდებლო ინიციატივის ავტორია ფრაქცია "ქართული ოცნებაა". პარლამენტმა ახალ ინიციატივამდე დეპუტატ კობა დავითაშვილის მიერ ინიცირებული "პროკურატურის შესახებ" საკანონმდებლო პაკეტი პირველი მოსმენით განიხილა და მხარდუჭერილია იურიდიულ საკითხთა კომიტეტის მიერ.
კობა დავითაშვილი ახალ საკანონმდებლო ინიციატივას არ იზიარებს. მისთვის გაუგებარია ცვლილების არსი, რომლის მიხედვით, იუსტიციის სამინისტროს ფარგლებში პროკურატურის დამოუკიდებლობა იზრდება და ასევე, პირველი პროკურორი იქნება არა იუსტიციის მინისტრი, არამედ, მთავარი პროკურორი.
"ჩემს მიერ მომზადებულ კანონპროექტში იუსტიციის მინისტრს პროკურატურის მოწყობასთან დაკავშირებული ნორმატიული აქტების გამოცემის უფლება რჩება და მას იუსტიციის მინისტრი მთავარი პროკურორისგან დამოუკიდებლად ვერ გამოსცემს. ახლა პროკურატურაში გაჩნდა იდეა, რომ ეს უფლებებიც პროკურატურას ჰქონდეს. მე ამ მოსაზრებას არ ვიზიარებ", - განაცხადა დავითაშილმა და აღნიშნა, რომ კონსტიტუცის მიხედვით, პროკურატურა იუსტიციის სამინისტროს შემადგენელი ნაწილია და იუსტიციის მინისტრი საერთო ხელმძვანელობას ახორციელებს, მას რაღაც უფლებამოსილებები უნდა ჰქონდეს. ნორმატიული აქტების გამოცემის მთავარი პროკურორის გამგებლობაში გადაცემა კონსტიტუციას ეწინააღმდეგება.
