დღეს გამართულ საქართველოს პარლამენტის ბიუროს სხდომაზე პარლამენტის თავმჯდომარემ დავით უსუფაშვილმა ბოლო პერიოდში ქვეყანაში განვითარებულ მოვლენებთან დაკავშირებით განცხადება გააკეთა.
დავით უსუფაშვილმა დეპუტატებს რესტორან „ლა ტრუფეში" მომხარი ინციდენტის შედეგად პარლამენტის წევრების ფიზიკური დაზიანების ფაქტთან დაკავშირებით გამოძიების დასრულებამდე წინასწარი შეფასებებისგან თავის შეკავებისკენ მოუწოდა.
"ქვეყანაში მსგავი ინციდენტები არ უნდა ხდებოდეს. დეპუტატები გამოძიებასთან თანამშრომლობენ და დარწმუნებული ვარ სამართალდამცავები სიტუაციაში გაერკვევიან. ყველას ვთხოვ, რომ წინასწარი პოლიტიკური შეფასებებისგან თავი შეიკავოს და ამ ინციდენტის შესახებ მხოლოდ გამოძიების დასრულების შემდეგ ვისაუბროთ", - განაცხადა დავით უსუფაშვილმა.
პარლამენტის თავმჯდომარე შინაგან საქმეთა მინისტრის პირველი მოადგილის, გელა ხვედელიძის დაპატიმრების ფაქტსაც გამოეხმაურა და აღნიშნა, რომ ყველამ უნდა გაიზიაროს ის სახელმწიფოებრივი პასუხისმგებლობა, რომელიც თანამდებობის პირებს აკისრიათ. მომხდარ ფაქტთან დაკავშირებით შესაბამისი რეაგირების არ მოხდენა სახელმწიფოს მხრიდან არ შეიძლება.
საქართველოს პარლამენტის პრეს-სამსახურის ინფორმაცით, განცხადების გაკეთების შემდეგ პარლამენტის თავმჯდომარემ ბიუროს წევრებს მიმდინარე კვირის პლენარული სხდომების დღის წესრიგით გათვალისწინებული საკითხები გააცნო. კანონმდებლებმა ახალი საკანონმდებლო ინიციატივები და საორგანიზაციო საკითხებიც განიხილეს.
დავით უსუფაშვილის განცხადებით, მიუხედავად იმისა, რომ რაოდენობრივად ცოტა პროექტებია, შინაარსობრივად საკმაოდ მოცულობითი სამუშაოა და ამიტომ შესაძლოა შაბათს, 18 მაისს პლენარული სხდომის გამართვის აუცილებლობაც დადგეს. ამის შესახებ პარლამენტის წევრები ოთხშაბათის პლენარულ სხდომაზე იმსჯელებენ. მიმდინარე კვირაში პარლამენტის წევრები სხვადასხვა კანონპროექტებთან ერთად შრომის კოდექსს, ოკუპირებული ტერიტორიების, საზოგადოებრივი მაუწყებლობის და პროკურატურის შესახებ კანონპროექტებს განიხილავენ.
ბიუროს მორიგი სხდომა ოთხშაბათს, პლენარული სხდომის დაწყებამდე გაიმართება.