IDFI-იმ პროექტის „საჯარო ინფორმაციის მონაცემთა ბაზა" ფარგლებში „რეგიონებში განხორციელებული სპეციალური ტრანსფერები წინასაარჩევნო პერიოდში" კვლევა წარმოადგინა, რომლის მიხედვითაც ირკვევა, რომ 2012 წლის 9 თვის განმავლობაში ხსენებული პროექტების დაფინანსებაზე გაცემული მთავრობის განკარგულებები ეტაპობრივად განიცდიდა ცვლილებებს. მთავრობის განკარგულების თარიღისა და ნომრის ცვლილების გარეშე ხდებოდა განკარგულებაში გამოყოფილი თანხის ზრდა, რაც გაუგებარს ხდიდა კონკრეტული თარიღით და ნომერით გამოცემული განკარგულებით რა თანხის გამოყოფა მოხდა მთავრობის მიერ.
2012 წლის 9 თვის განმავლობაში საქართველოს რეგიონებში განსახორციელებელი პროექტების ფონდიდან ყველაზე დიდი თანხა (40 000 000 ლარი) გამოიყო საქართველოს მთავრობის 2012 წლის 12 აპრილის N660 განკარგულებით, რომელიც უკავშირდება „Batumi Tawer"- ის მშენებლობის პროექტის ნაწილობრივ დაფინანსებას. აღნიშნული განკარგულების გამოცემას წინ უძღვოდა შპს „რეილვეი ფროფერთი მენეჯმენტსა" და ეკონომიკისა და მდგრადი განვითარების სამინისტროს შორის გაფორმებული ჩუქების ხელშეკრულება, რომლის მიხედვითაც სამინისტროს გადაეცა მშენებლობის პროექტთან დაკავშირებული აქტივები და ვალდებულებები. ეკონომიკისა და მდგრადი განვითარების სამინისტროს წინადადებით მშენებლობის დამკვეთად განისაზღვრა სახელმწიფო 100% წილობრივი მონაწილეობით შექმნილი შპს „ბათუმი თაუერი" , რომელსაც საწყის ეტაპზე გამოეყო 5 000 000 მილიონი ლარი.
2012 წლის 9 თვის სახელმწიფო ბიუჯეტის შესრულების ანგარიშიდან ირკვევა, რომ ზემოთ მოყვანილმა განკარგულებამ განიცადა ცვლილებები და ამ პერიოდში მშენებლობის დაფინანსების მიზნით გამოყოფილია 40 000 000 ლარი.

ყველაზე ძვირად ღირებული პროექტების ჩამონათვალში სიდიდით მეორე თანხა (28 500 000 ლარი) გამოყოფილია რაბათის უბნის რეაბილიტაციისთვის. რაბათის უბნის რეაბილიტაციისთვის თანხები გამოიყო საქართველოს მთავრობის N15, 04.01.12 (23 000 000 ლარი) და N1310, 06.07.12 ( 5 500 000 ლარი) განკარგულებებით. საწყის ეტაპზე N15, 04.01.12 განკარგულებით გამოიყო, 9 000 000 ლარი, რომელიც როგორც ჩანს შემდგომი ცვლილებებით 23 000 000 ლარამდე

2012 წლის 9 თვის განმავლობაში საქართველოს მთავრობის N218, 08.02.12 და N302,21.02.2012 განკარგულებებით გამოიყო 26 267 780 ლარი განმუხურში წყლის პარკის მოწყობისთვის. „ჩვენს ხელთ არსებული დოკუმენტაცია საშუალებას გვაძლევს გამოვარკვიოთ, რომ განმუხურში წყლის პარკის მოწყობასთან დაკავშირებულ სამუშაოებს თავდაპირველად კურირებდა სახელმწიფო 100% წილობრივი მონაწილეობით შექმნილი შპს "სახლემწიფო მომსახურების ბიურო", რომლის მიერ შპს „ბლექ სი გრუპი"-ს გადაერიცხა 14 200 000 ლარი, ხოლო შემდგომში შპს "სახელმწიფო მომსახურების ბიუროს" ვალდებულება გადაეცა შპს „ანაკლიას", რომლის 100% წილის მფლობელი გახლავთ ასევე სახემწიფო.
ზემოთ მოყვანილი ძვირად ღირებული პროექტების უმრავლესობის დამკვეთად განსაზღვრული იყო , სახელმწიფო 100% წილობრივი მონაწილეობით შექმნილი შპს- ები, რის გამოც ინსტიტუტი ვერ ახერხებდა კონკრეტული თანხების დეტალური ხარჯთაღრიცხვების მოპოვებას. მხოლოდ ახალციხის გამგეობისგან იქნა მოწოდებული ყველა ღონისძიებების ჩამონათვალი, ხელშეკრულების ღირებულების მითითებით, რომლებიც ემსახურებოდა რაბათის უბნის რეაბილიტაციას. ზემოთ მოყვანილი პროექტების მსგავსი მასშტაბური პროექტების დამკვეთად შპს-ების განსაზღვრა შეუძლებელს ხდიდა ინსტიტუტისთვის მიეღო საჯარო ინფორმაცია სახელმწიფო ბიუჯეტიდან დაფინანსებული ინფრასტრუქტურული პროექტების შესახებ"- განმარტავენ IDFI-ში.