დღეს, 14 ნოემბერს, 13:30 საათზე წყალტუბოში, „საქართველოს სახელმწიფო ელექტროსისტემის" ქვესადგურში „წყალტუბო-220" გაიმართება ამერიკის მთავრობის ახალი პროექტის „ენერგეტიკული ინფრასტრუქტურის განვითარება" გახსნის საზეიმო ცერემონიალი, რომელსაც დაესწრებიან აშშ-ის ელჩი საქართველოში რიჩარდ ნორლანდი, ენერგეტიკისა და ბუნებრივი რესურსების მინისტრი კახი კალაძე, „საქართველოს სახელმწიფო ელექტროსისტემის" მმართველთა საბჭოს თავმჯდომარე სულხან ზუმბურიძე, USAID-ისა და Tetra-Tech-ის წარმომადგენლები.
„ენერგეტიკული ინფრასტრუქტურის განვითარების პროგრამა" აშშ-ის საერთაშორისო განვითარების სააგენტოსა (USAID) და საქართველოს მთავრობას შორის 2010 წლის თებერვალში გაფორმებული „ტექნიკური დახმარების ხელშეკრულების" ფარგლებში მიმდინარეობს და მის ერთ-ერთ მნიშვნელოვან კომპონენტს წარმოადგენს 220 კილოვოლტის ელექტროგადამცემი ხაზების "სენაკი-1,2" რეკონსტრუქცია და ქვესადურებში "მენჯი-220" და "წყალტუბო-220" შესაბამისი უჯრედების რეაბილიტაცია.