ნავთობპროდუქტების იმპორტიორთა კავშირის თავჯდომარე ვანო მთვრალაშვილი მოითხოვს, რომ მთლიანად უნდა შეიზღუდოს აზბესტშემცველი საქონლის იმპორტი. როგორც მთვრალაშვილმა დღეს გამართულ ბრიფინგზე განაცხადა, აღნიშნული საკითხის გადასაჭრელად ნავთობპროდუქტების იმპორტიორთა კავშირი და ნ. მახვილაძის სახელობის შრომის, მედიცინისა და ეკოლოგიის სამეცნიერო კვლევითი ინსტიტუტი აღნიშნული პრობლემის გადასაჭრელად წერილობით თხოვნით მიმართავენ საქართველოს პრეზიდენტსა და საქართველოს პარლამენტის თავჯდომარეს.
რეგულაციის ქვეშ არ არის მოქცეული აზბესტშემცველი ნარჩენების უსაფრთხო განთავსებისა და უტილიზაციის საკითხი.
კონფერენციის გამომსვლელებმა განსაკუთრებით აღნიშნეს აზბესტის შეცველი სამუხრუჭე ხუნდების მავნე ზემოქმედება მძღოლებსა და მგზავრებზე, ასევე ხუნდის გაცვეთის შემდეგ წარმოქნილი მტვერი ილექება ნიადაგში და საფრთხეს უქმნის ფეხით მოსიარულეთა ჯანმრთელობას.
„იმის გამო, რომ არ არის უზრუნველყოფილი უსაფრთხოების სპეციალური ზომები, შრომის უსაფრთხოების კონტროლი, რეალური ხდება დასაქმებულთა ორგანიზმზე აზბესტის პროფესიული ექსპოზიციის შესაძლებლობა. რეგულაციის ქვეშ არ არის მოქცეული აზბესტშემცველი ნარჩენების უსაფრთხო განთავსებისა და უტილიზაციის საკითხი. ჩვენი აზრით, პირველ რიგში ქვეყანამ უნდა შეადგინოს აზბესტზე ეროვნული პროფილი _ ინფორმაციული დოკუმენტი, სადაც აისახება აზბესტის შემცველი პროდუქციის მოხმარების სურათი, მოსახლეობის ის ჯგუფი, რომელიც აზბესტის ზემოქმედების რისკის ქვეშ არის ამჟამად და იყო წარსულში, აგრეთვე დაავადებები განპირობებული აზბესტით. ასევე მიგვაჩნია, რომ მთლიანად უნდა შეიზღუდოს აზბესტშემცველი საქონლის იმპორტი. აღნიშნული საკითხის გადასაჭრელად ჩვენ წერილობით თხოვნით მივმართავთ საქართველოს პრეზიდენტსა და საქართველოს პარლამენტის თავმჯდომარეს", - განაცხადა მთვრალაშვილმა.
მისი თქმით, მასალები და პროდუქცია, რომლებიც შეიცავენ აზბესტს, რეალური კანცეროგენია და მისი ზემოქმედება მომაკვდინებლად მოქმედებს ადამიანებზე (აღნიშნული მასალის შემცველი პროდუქციის წარმოება და იმპორტი არ არის აკრძალული).
„დღეისათვის მიჩნეულია, რომ მსოფლიოში აზბესტის ზემოქმედებას სამუშაო ადგილებზე განიცდის 125 მილიონი ადამიანი. მსოფლიო ჯანდაცვის ორგანიზაციის (ჯანმო) მონაცემებით, მსოფლიოში ყოველწლიურად აზბესტით განპირობებული დაავადებებით (აზბესტოზით, სასუნთქი გზების, ფილტვის კიბოთი და მეზოთელიომით) იღუპება 100000-ზე მეტი ადამიანი, რაც შეადგენს პროფესიული დაავადებით გამოწვეული სიკვდილიანობის 50%-ზე მეტს. ცნობილია ისიც, რომ აშშ და დასავლეთ ევროპა კომპენსაციის სახით დაავადებულთათვის გასცემს 280 მილიონ დოლარს. გარდა ამისა, ითვლება, რომ მრავალი ათასი ადამიანის სიკვდილი შეიძლება გამოწვეულ იყოს აზბესტის ზემოქმედებით, ეკოლოგიური და საყოფაცხოვრებო კონტაქტის პირობებში.
ცნობისთვის, აზბესტის შემცველი პროდუქციის წარმოება ჩვენს ქვეყანაში უკვე თითქმის 20 წელია შეწყვეტილია, მაგრამ კვლავ ხორციელდება მისი იმპორტი. აზბესტის შემცველი პროდუქცია გამოიყენება: მშენებლობაში, როგორც კონსტრუქციული, საიზოლაციო, საჰერმეტიზაციო, გადასახური საშუალება, ცეცხლგამძლე და მჟავაგამძლე მასალა სხვადასხვა ქსოვილების დასამზადებლად; ელექტროობაში, როგორც საიზოლაციო საშუალება, აგრეთვე ქაღალდის წარმოებაში, აზბესტტექნიკური მასალა ფართოდ გამოიყენება სხვადასხვა დანიშნულების ავტომანქანების სამუხრუჭე სისტემაში. გარდა ამისა, აზბესტის ზემოქმედების საშიშროება არის ძველი შენობების რეკონსტრუქციის, დემონტაჟის, შიფერის სახურავების შეცვლის, და ნარჩენების გატანის დრო", - აღნიშნა მთვრალაშვილმა.
