მოძრაობა "სამართლიანი საქართველოსთვის" გურიის რეგიონული ორგანიზაციის ლიდერი ილია კალანდაძე და მოძრაობის ოზურგეთის რაიონული ორგანიზაციის ხელმძღვანელი ლელა ნაცვალაძე ხელისუფლების იმ ინიციატივას აკრიტიკებენ, რომლის მიხედვითაც, პენსიების ზრდა და სოციალური შეღავათები მხოლოდ დედაქალაქში მცხოვრები პენსიონერებისა და პედაგოგებისთვის არის გათვალისწინებული.
"ჩვენ პრეტენზია არა გვაქვს თბილისელ პენსიონერებთან და პედაგოგებთან, რადგან მათ ნამდვილად სჭირდებათ მატერიალური დახმარება. მაგრამ რეგიონებში მცხოვრები ადამიანები გაცილებით რთულ პირობებში ცხოვრობენ და უფრო მეტი პრობლემა აწუხებთ. მათი დისკრიმინაცია დაუშვებელია", _ განაცხადეს 28 დეკემბერს გამართულ პრესკონფერენციაზე ილია კალანდაძემ და ლელა ნაცვალაძემ.
მოძრაობის გურიის რეგიონული ორგანიზაციის ხელმძღვანელმა ჟურნალისტებს შეახსენა, რომ მთიან რეგიონში მცხოვრები პედაგოგები, გარკვეული დროის განმავლობაში, ხელფასზე დანამატსაც იღებდნენ, მაგრამ შემდგომში ეს შეღავათი გაუქმდა.
28 დეკემბერს ოზურგეთის რაიონის საკრებულოს სხდომაც ჩატარდა, რომელსაც რაიონის გამგებელი ავთანდილ მექვაბიშვილი ესწრებოდა. სხდომაზე ლელა ნაცვალაძე (იგი ოზურგეთის საკრებულოს წევრია) გამოვიდა ინიციატივით, რომ ადგილობრივი ბიუჯეტიდან მომხდარიყო თანხის გამოთავისუფლება და მათი მიმართვა პენსიების გასაზრდელად.
"20 ათასი ოზურგეთელი პენსიონერის პენსიის გასაზრდელად 2,4 მილიონი ლარია საჭირო. ვინაიდან ამ თანხას რაიონის ბიუჯეტი ვერ გასწვდება, კარგი იქნება, თუ გურიის მხარის გუბერნატორი შესაბამისი თხოვნით მიმართავს ცენტრალურ ხელისუფლებას", _ მოითხოვა მოძრაობის ოზურგეთის რაიონული ორგანიზაციის ხელმძღვანელმა, მაგრამ მის ინიციატივას ადგილობრივმა ხელისუფლებამ მხარი არ დაუჭირა.
ნაცვალაძეს ცინიზმად მიაჩნია ის, რომ ხელისუფლებამ "მოახერხა" სახსრების მოძიება და ოზურგეთის რაიონს პრეზიდენტის ფონდიდან 35 ათასი ლარი ჩაურიცხა საახალწლო ღონისძიებების დასაფინანასებლად.
