ხელისუფლება გამომცემლობა "სამშობლოს" შენობას ახალი მეპატრონე უპოვნა. "ჯი-ეიჩ-ენის" ინფორმაციით, მთავრობა კომპანია "სითი ლოფტთან" შენობის პირდაპირი წესით მიყიდვაზე მოლაპარაკებებს აწარმოებს და მფლობელიც სწორედ ის გახდება.
სააგენტოს ინფორმაციით, კოსტავას №14-ში მდებარე, 9447 კვ/მ არასასასოფლო-სამეურნეო დანიშნულების მიწის ნაკვეთისა და მათზე დამაგრებული შენობა-ნაგებობების მფლობელი "სითი ლოფტი" 9 მლნ დოლარად ხდება.
„სითი ლოფტი" ვალდებულია ასევე ეკონომიკისა და მდგრადი განვითარების სამინისტროსთან ხელშეკრულების გაფორმების შემდეგ 4 წლის განმავლობაში, 10 მლნ. დოლარის ინვესტიცია განახორციელოს და აღნიშნულ ფართზე სამშენებლო-სარეკოსტრუქციო სამუშაოები ჩაატაროს.
კომპანია „სითი ლოფტი"2011 წლის 8 სექტემბერს დაფუძნდა. კომპანიის იურიდიული მისამართია თბილისი, 26 მაისი სახელობის მოედანი.
კომპანიის დირექტორია ევგენი დავითაია, ხოლო კომპანიის 100 %-იანი წილი გიორგი ჩხეტიას ეკუთვნის. კომპანია დაფუძნების დღესვე, ანუ 8 სექტემბერს, სამეწარმეო რეესტრში რეგისტრაციაში დაჩქარებული წესით გაატარდა, რისთვისაც კომპანიის წარმომადგენელმა დავით ოყროშიძემ 200 ლარი გადაიხადა.
შეგახსენებთ, რომ ობიექტი ელეტრონულ აუქციონზე, 19 ივლისს უნდა გაყიდულიყო, თუმცა მაშინ „სამშობლოს" მსურველი არ გამოჩენილა.
კოსტავას ქ. №14-ში მდებარე 9447.00 კვ.მ არასასოფლოსამეურნეო დანიშნულების მიწის ნაკვეთისა და მასზე განთავსებული შენობა-ნაგებობების საწყისი ღირებულება მაშინ 16 მლნ. 200 ათას ლარად იყო განსაზღვრული.
ეკონომიკისა და მდგრადი განვითარების სამინისტროს გამომცემლობა "სამშობლოს" შენობა ჯერ კიდევ, 2011 წლის 12 ივლისს უნდა გაეყიდა, თუმცა სამინისტრომ აუქციონის ჩატერბის თარიღი 7 დღით, 19 ივლისამდე გადასწია. გამომცემლობა "სამშობლოს" შენობა აუქციონზე რამდენჯერმე იყო გატანილი, თუმცა ობიექტის გასხვისება ვერ მოხერხდა. გამომცემლობა "სამშობლოს" საპრივატიზაციო აუქციონი პირველად 2006 წლის 3 მარტს გაიმართა, მაშინ გამომცემლობის საწყისი ფასი 20 მლნ აშშ დოლარი იყო.