დღეს, 15 სექტემბერს, 19:00 საათზე, საქართველოს ეროვნულ მუზეუმში, ქვევრის ღვინის 1-ლი საერთაშორისო სიმპოზიუმი გაიმართება.
აშშ-ის საერთაშორისო განვითარების ეკონომიკური აღმავლობის ინიციატივა (EPI) მხარს უჭერს ქვევრის ღვინის პირველ საერთაშორისო სიმპოზიუმს. მისი მიზანია, 3 დღის განმავლობაში უმასპინძლოს ღვინისა და ღვინის ტურიზმის საერთაშორისო სპეციალისტებს, გააცნოს ქვევრის ღვინის ტრადიცია, ქვევრის უნიკალურობა, ქართული ღვინის ისტორია და ამასთანავე, ხელი შეუწყოს როგორც ქვევრის ღვინის წარმოჩენას, ისე ღვინის ტურიზმის სამომავლო განვითარებას საქართველოში.
სიმპოზიუმის ინიციატორების, ორგანიზატორებისა და პარტნიორების მიერ შექმნილი პროექტის თანახმად, ღონისძიება ემსახურება ქართული ქვევრის ღვინის, ასევე ზოგადად საქართველოში წარმოებული ღვინისა და ღვინის ტურიზმისადმი ინტერესის გაძლიერებასა და ცნობადობის ამაღლებას.
სიმპოზიუმის ფარგლებში მონაწილეთათვის ჩატარდება ლექციები, ქართველი და უცხოელი სპეციალისტებისთვის გაიმართება შეხვედრები, ღვინის დეგუსტაციები, ვიზიტები ტრადიციულ და თანამედროვე ღვინის მარნებში, ქართული სამზარეულოს, მრავალმხმიანი სიმღერის, უძველესი ტრადიციებისა და ზოგადად ქართული კულტურის გაცნობა.
ქვევრის ღვინის 1-ელ საერთაშორისო სიმპოზიუმში მონაწილეობენ: 60-მდე უცხოელი სტუმარი (აშშ, კანადა, დიდი ბრიტანეთი, გერმანია, საფრანგეთი, იტალია, უკრაინა, თურქეთი, ჩილე, პოლონეთი, ჩეხეთი), ღვინის ექსპერტები, ღვინის ტურიზმისა და მარკეტინგის პროფესიონალები, ღვინის ეთნოგრაფები, მეცნიერები და მკველევარები. სიმპოზიუმს გააშუქებენ უცხოელი და ქართველი ჟურნალისტები.
სიმპოზიუმის ორგანიზატორები და მხარდამჭერები არიან: ასოციაცია "ქართული ღვინო", "ქვევრის ფონდი", საქართველოს შემომყვან ტურ-ოპერატორთა ასოციაცია, "ჯორჯიან ივენტსი", საქართველოს ეროვნული საინვესტიციო სააგენტო, მსოფლიო ბანკი, საქართველოს ეროვნული მუზეუმი, ალავერდის მონასტერი, სხვა პარტნიორები და მხარდამჭერები.
აშშ-ის საერთაშორისო განვითარების ეკონომიკური აღმავლობის ინიციატივა (EPI), ოთხწლიანი პროექტის ფარგლებში, ორმოც მილიონიანი ბიუჯეტით გეგმავს საქართველოს ეკონომიკის სხვადასხვა სექტორის, მათ შორის ღვინისა და ღვინის ტურიზმის განვითარებას, ღირებულებათა ჯაჭვის მდგრადობისა და კონკურენტუნარიანი გარემოს შექმნას.
საქართველოს მეღვინეობისა და ღვინის ტურიზმის პოტენციალის გათვალისწინებით, EPI მხარს უჭერს საქართველოს, როგორც "ღვინის ქვეყნის" წარმოჩენას და დამკვიდრებას მსოფლიო ბაზარზე. ამავდროულად, პროექტი გეგმავს ღვინის ტურიზმის სექტორისა და ასოციაციების დახმარებას მაღალი ხარისხის სტანდარტის ჩამოყალიბებისა და მარკეტინგის მამართულებით.
