"ქართული პარტიის" პოლიტსაბჭოს წევრმა სოფიო ხორგუანმა დღეს გამართულ ბრიფინგზე განაცხადა, რომ "ქართული პარტია" ხელისუფლების მიერ შევიწროვებული მოქალაქეების და ინსტიტუტების სამართლებრივ დაცვას განაგრძობს.
მისი თქმით, 8 გრძელდება სასამართლო დავა იმ დევნილების უფლებების დასაცავად, რომლებმაც საკომპენსაციო თანხის - 10000 აშშ დოლარის - სანაცვლოდ, საცხოვრებელ ფართზე უარი თქვეს, მაგრამ ეს თანხა დღემდე არ მიუღიათ. ხორგუანის განცხადებით, უახლოეს დღეებში დაიწყება დევნილების გამოსახლება სასტუმრო „აფხაზეთიდან". იგი მოუწოდებს ხელისუფლებას, ეს პროცესი გამჭვირვალედ ჩაატაროს, ხოლო კომპენსაცია იყოს ადექვატური.
ხორგუანის თქმით, ხელისუფლება მოსახლეობას კიდევ ერთ უსიამოვნო სიურპრზს უმზადებს, რაც ბაგა-ბაღების მომსახურების გაძვირებაში გამოიხატება.
„მართალია, ხელისუფლება ცდილობს დაგვარწმუნოს, რომ ეს მოქალაქეების ინტერესების დასაცავად კეთდება, მაგრამ ბავშვი და ოჯახი ნამდვილად არ არის მისი პრიორიტეტი", - აცხადებს „ქართული პარტიის" პოლიტსაბჭოს წევრი.
მისივე თქმით, დღეს იწურება თბილისის მერიიდან ინფორმაციის მიღების ვადა იმის თაობაზე, მმართველობის რა ფორმით გადაეცა მას ბოტანიკური ბაღი და რა შენობა- ნაგებობებზეა საუბარი. თბილისის მერიის გარდა, „ქართულმა პარტიამ" წერილობით მიმართა განათლებისა და მეცნიერების სამინისტროსაც და მოითხოვა საჯარო ინფორმაცია იმის შესახებ, თუ რა კრიტერიუმებით იხელმძღვანელა დიმიტრი შაშკინის უწყებამ, როდესაც ბოტანიკის, ფილოსოფიის და ფსიოქოლოგიის ინსტიტუტებს დაფინანსება შეუწყვიტა.
„თუ თბილისის მერია და განათლებისა და მეცნიერების სამინისტრო აღნიშნულ საჯარო ინფორმაციას არ მოგვაწვდიან, სასამართლოს მივმართავს და ამ ინფორმაციის მოპოვებას სასამართლოს გზით შევეცდებით", - აღნიშნა სოფიო ხორგუანმა.
ბრიფინგზე პარტიის პოლიტსაბჭოს წევრი თბილისის ტელეანძის აუქციონის საკითსაც შეეხო. ხორგუანის განცხადებით, „ქართული პარტია" წერილობით მიმართავს ეკონომიკისა და მდგრადი განვითარების სამინისტროს და მოითხოვს, მოგვაწოდოს აუქციონში გამარჯვებულ კომპანიასთან გაფორმებული ხელშეკრულება და პასივების და აქტივების სრული ჩამონათვალი.
სოფიო ხორგუანის თქმით, დღეს თბილისის საქალაქო სასამართლოში იხილება „ქართული პარტიის" დახმარებით შეტანილი სარჩელი, რომელიც შეიცავს მოთხოვნას, მიწის ფასები განისაზღვროს ისე, რომ გლეხს მისი შესყიდვის შესაძლებლობა მიეცეს.
ხორგუანის განცხადებით,„ქართული პარტია" ყველაფერს გააკეთებს, რომ გლეხი მიწის გარეშე არ დარჩეს და საარსებო საშუალება არ წაერთვას.
