18 აპრილს, 17:00 საათზე, "თიბისი ბანკის" საგამოფენო დარბაზში, მცირე და საშუალო საწარმოთა კონკურსში გამარჯვებულ ფირმებისა და კომპანიების დაჯილდოების ცერემონიალი გაიმართება. საქართველოს სავაჭრო-სამრეწველო პალატის ინფორმაციით, 2005 წლიდან უკვე ტრადიციად ქცეული კონკურსის მიზანია ქვეყნის მასშტაბით საუკეთესო მცირე და საშუალო საწარმოთა, ინდმეწარმეთა და ფერმერთა გამოვლენა, მათი საქმიანობის წარმოჩენა და წახალისება.
კონკურსი ჩატარდა ქვეყნის მასშტაბით ოთხ ნომინაციაში: საუკეთესო მცირე საწარმო ან ინდმეწარმე; საუკეთესო საშუალო საწარმო; საუკეთესო ექსპორტიორი მცირე და საშუალო ბიზნესიდან; საუკეთესო ფერმერი და აგროფირმა;
კონკურსის ჩატარებაში აქტიური მონაწილეობა მიიღეს რეგიონალურმა სავაჭრო-სამრეწველო პალატებმა. მათ მიერ რეგიონების მიხედვით შერჩეული იქნა საუკეთესო ფირმები და ორგანიზაციები, რომელთა მონაცემები განსახილველად წარედგინა საქართველოს სავაჭრო-სამრეწველო პალატასთან შექმნილ საკონკურსო კომისიას, რომლის შემდგენლობაში შედიოდნენ ცნობილი ექსპერტები ეკონომიკის დარგში, ბიზნესმენები და მასობრივი ინფორმაციის საშუალებების წარმომადგენლები.
კომისიამ შეაჯამა თითოეული ფირმის მაჩვენებლები და ზემოთ აღნიშნულ ოთხივე ნომინაციაში გამოავლინა გამარჯვებულები და ლაურიატები.
კონკურსში გამარჯვებულ ფირმებსა და ორგანიზაციებს დააჯილდოებენ: საქართველოს ეკონომიკისა და მდგრადი განვითარების მინისტრი ვერა ქობალია, საქართველოს სოფლის მეურნეობის მინისტრი ბაკურ კვეზერელი, საქართველოს ეროვნული საინვესტიციო სააგენტოს დირექტორი ქეთევან ბოჭორიშვილი, საქართველოს სავაჭრო-სამრეწველო პალატის პრეზიდენტი ჯემალ ინაიშვილი.
