ჩინეთის საგარეო საქმეთა სამინისტროს პრესსპიკერმა მაო ნინგმა განაცხადა, რომ ამ დროისთვის არ აქვს ინფორმაცია ჩინეთის, აშშ-ისა და რუსეთის ლიდერების შესაძლო შეხვედრის შესახებ.
მას ჰკითხეს მედიაში გავრცელებული ინფორმაციის თაობაზე, რომლის თანახმადაც, რუსეთის პრეზიდენტმა ვლადიმირ პუტინმა მომდევნო თვეში ჩინეთის, აშშ-ისა და რუსეთის ლიდერების შეხვედრის გამართვა შესთავაზა. გავრცელებული ცნობით, შეხვედრაზე უკრაინაში რუსეთის მიერ დაწყებული ომის დასრულების საკითხი უნდა განეხილათ.
„ამ დროისთვის არ მაქვს ინფორმაცია, რომლის გაზიარებაც შემიძლია“, - განაცხადა მაო ნინგმა.
ცნობისათვის, გამოცემა The Wall Street Journal-ი წყაროებზე დაყრდნობით წერს, რომ რუსეთის პრეზიდენტი ვლადიმირ პუტინი მომდევნო თვეში დონალდ ტრამპსა და ჩინეთის ლიდერ სი ძინპინთან შეხვედრის ინიციატივით გამოვიდა. შეხვედრის მიზანი უკრაინაში არსებული ვითარების განხილვა და რუსეთის მიერ უკრაინის წინააღმდეგ დაწყებული ომის მოსკოვისთვის სასარგებლო პირობებით დასრულებაა.
აშშ-ის სახელმწიფო მდივანმა მარკო რუბიომ 18 ოქტომბერს, უზბეკეთში ვიზიტისას, დაადასტურა, რომ აშშ-ის, რუსეთისა და ჩინეთის ლიდერების შესაძლო შეხვედრაზე მოლაპარაკებები მიმდინარეობდა. თუმცა, მას არ დაუზუსტებია, შეთანხმებულია თუ არა შეხვედრა საბოლოოდ.
